Ukraynada son durum: Rus ordusunun bütün hücumları dəf edildi

Son sutka ərzində cəbhədə Ukrayna və Rusiya qüvvələri arasında 36 toqquşma baş verib.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Rusiya gecə saatlarında 2 ədəd “Şahid” tipli hücum PUA-sı və 1 ədəd X-59 idarəolunan raketi ilə Ukrayna ərazisinə zərbələr endirib. Rusların bütün PUA-ları məhv edilib.

Rusiya qüvvələri Kupyan istiqamətində Sinkivka qəsəbəsi ərazisinə uğursuz hücum əməliyyatı keçirib. Ruslar Baxmut istiqamətində Ukrayna ordusunun 3 hücumunu dəf etdiyi Klişçivkada itirilmiş mövqelərini bərpa etməyə nəticəsiz cəhd göstərib.

Ukrayna qoşunlarına gəlincə, Baxmut şəhərinin cənubunda hücum əməliyyatlarını davam etdirirlər.

Rusiya Avdiv şəhərini mühasirəyə almaq cəhdlərini dayandırmır, amma Ukrayna ordusu bu istiqamətdə müdafiəni möhkəm saxlayır.

Ukrayna qüvvələri Donetsk vilayətinin Marin, Novomixaylivka və Staromayorsk rayonlarında rusların hücumlarını dəf ediblər. Eyni zamanda, Ukrayna ordusu Melitopol istiqamətində hücum əməliyyatını davam etdirir.