Valideynlərdən ağılasığmaz əməl - Körpələrini küçəyə atdılar

İngiltərədə valideynlər yeddi il ərzində yeni doğulmuş üç körpəni küçəyə atıblar.

Teleqraf.com Daily Mail-ə istinadən xəbər verir ki, məhkəmənin qərarı ilə 2017-ci ildən bəri Londonun şərqində tapılan üç körpənin DNT testləri ortaya çıxıb. Nəticədə onların qardaş və bacı olduğu məlum olub.

Qeyd edək ki, ilk uşaq 2017-ci ilin sentyabrında Plaistov bölgəsində ağ yorğana bükülmüş halda tapılıb.

31 yanvar 2019-cu ildə isə Nevham parkında skamyanın yanında çantada daha bir oğlan tapılıb.

2024-cü ilin yanvarında eyni ərazidə valideynlər qızlarını tərk ediblər. Yeni doğulmuş körpə parkda itlərini gəzdirən cütlük tərəfindən tapıldığına görə sağ qalıb.

Oğlanlar övladlığa götürülüb, soyuqda tərk edilmiş qıza isə "Soyuq ürək" cizgi filminin qəhrəmanının şərəfinə Elza adı verilib.

Hazırda atılmış uşaqların anası axtarılır.