İranın “yorğun PUA-lar”ı cəbhədə: Vurmağa ehtiyac olmadı, öz-özünə düşdülər

Rusiya Silahlı Qüvvələri gecə saatlarında yenidən Ukrayna ərazilərinə raket və PUA-larla zərbələr endirib.

Teleqraf.com xəbər verir ki, bu barədə Ukrayna Hərbi Hava Qüvvələri məlumat yayıb.

Ukrayna obyektləri Voronej və işğal altındakı Donetsk vilayətindən “İsgəndər-M” ballistik raketi və S-300 sistemləri ilə hədəfə alınıb. Kursk vilayətindən də 52 ədəd İran istehsalı (“Şahid”) PUA atılıb.

Rusiyanın hava hücumunun dəf edilməsinə Kiyev, Poltava, Çerkassı, Dnepropetrovsk, Çerniqov, Kirovoqrad, Nikolayev və Sumı vilayətlərində aviasiya, zenit-raket qoşunları, elektron döyüş bölmələri və mobil atəş qrupları cəlb olunub.

Eyni zamanda, Ukrayna Hərbi Hava Qüvvələri hücumun qeyri-adi təfərrüatına diqqət çəkib, 20-dən çox “Şahid” öz-özünə düşüb.

“Hərbi hava vasitələri ilə 24 “Şahid” tipli hücum PUA-sı vurulub, 25-i isə öz-özünə düşüb. İki pilotsuz təyyarə Rusiya istiqamətində, digəri Belarusa uçub”, - məlumatda deyilir.