Tramp "MakDonalds"da "işə başladı"

ABŞ-ın keçmiş rəhbəri və Respublikaçılar Partiyasından prezidentliyə namizəd Donald Tramp özünü "MakDonald's"da aşpaz kimi sınayıb.

Teleqraf.com xəbər verir ki, onun fəst-fud restoranları şəbəkəsindəki işinin görüntülərini "Röyters" yayıb.

"Mən "MakDonald's"a kartof qızartması üzərində işləmək üçün gedirəm. Düşünürəm ki, bunu sabah Pensilvaniyada bir yerdə edəcəm", - deyə siyasətçi Pittsburq yaxınlığındakı mitinqdə tərəfdarlarına bildirib.

"Röyters" oktyabrın 20-də axşam saatlarında siyasətçinin kartof qızartmasını qablaşdıraraq qonaqlara verdiyini əks etdirən fotoşəkilləri dərc edib.

Tramp bundan əvvəl Demokratlar Partiyasından prezidentliyə namizəd Kamala Harrisi "MakDonald's"da iş təcrübəsi barədə yalan danışmaqda ittiham edib.