Bakıda istifadəsiz qalan quyudan neft çıxdı - Video

Məcburi köçkünlərin yaşadıqları evlərin yaxınlığında olan istifadəsiz quyudan neft çıxmağa başlayıb.

Teleqraf.com-un Xəzər TV-yə istinadən məlumatına görə, hadisə Bakı şəhəri, Sabunçu rayonunun eyni adlı qəsəbəsində, 6 saylı peşə məktəbinin həyətində qeydə alınıb. Sakinlər indiyə kimi burada hansısa köhnə neft quyusunun olduğunu bilməyiblər. Çünki fəaliyyətsiz quyunun üstü torpaqla örtülübmüş. Yerdən neftin püskürdüyünü görən sakinlər təşvişə düşüblər.

Ətrafda 50 yaxın məcbur köçkün ailəsi yaşayır. Sakinlər hər an baş verəcək adi partlayışla evlərinin uçaraq dağılacağından narahatdırlar. Ərazidə yaşayanlar bildirirlər ki, bir neçə qurumdan gəlib quyuya baxış keçiriblər, ancaq quyunu bağlamadıqları üçün onların narahatlıqları davam edir.

Məsələ ilə bağlı Sabunçu qəsəbəsinin icra nümayəndəliyi ilə əlaqə saxlanılıb.

Bildiriblər ki, ərazi Azneft İstehsalat Birliyinə məxsusdur və tədbir görülməsi üçün bu quruma müraciət edilib. Həmin idarənin işçiləri bir neçə gün ərzində əraziyə baxış keçirərək mühəndis qaydalarına uyğun olaraq lazımı tədbiri görəcəklər.