Üçrəngli şanlı Bayrağımız dövlətçiliyin, müstəqilliyin rəmzidir - Professor

Dövlət bayrağı xalqımızın birlik və vətənpərvərliyinin, qəhrəmanlıq və fədakarlığının, şərəf və ləyaqətinin təcəssümüdür. Bu gün Azərbaycan Dövlət Bayrağı Gününü qeyd edir. Artıq üç ildir ki, mühüm bayram sevinci daha böyük şövqlə yaşanılır. Çünki üçrəngli bayrağımız ölkəmizin işğaldan azad edilmiş bütün torpaqlarında – Şuşa, Xankəndi, Xocalı, Füzuli, Ağdam, Cəbrayıl, Zəngilanda qürurla dalğalanır.

Bayraq Gününü Böyük Qələbə Günündən cəmi bir gün ayırır. Bu dərin rəmzi məna kəsb edir. Bu bayraq altında igid əsgərlərimiz döyüşlərə getmiş, onu ürəklərinin başında saxlayaraq, Vətən uğrunda qəhrəmancasına həlak olanda isə şəhidlərimizin nəşinə bürünmüşdü. İgid hərbçilərimiz məhz bu bayrağın altında doğma şəhər və kəndlərin işğaldan azad edilməsi barədə Ali Baş Komandana raport verdilər. Azərbaycan Prezidenti, Ali Baş Komandan İlham Əliyev 2021-ci il yanvarın 15-də Şuşa şəhərində üçrəngli bayrağımızı qaldırarkən şəxsi heyətlə görüşündə demişdir: “Biz bura qalib kimi gəlmişik, bayrağı qaldırmışıq. Azərbaycanın bayrağı işğaldan azad edilmiş bütün torpaqlarda dalğalanır”. Möhtəşəm və təsvirolunmaz dərəcədə gözəl olan Azərbaycan bayrağı xalqımızın əzəli arzusu olan azadlıq və müstəqillik arzusuna çatmasını ifadə edir. Bayraqdakı üç rəng - mavi, qırmızı və yaşıl milli ideologiyamızın əsaslarını: türk mənşəli, müasirlik və demokratiyanın inkişafı arzusunu, İslam sivilizasiyasına mənsubluğu simvollaşdırır. Dövlətimizin suverenliyinin rəmzi olan Azərbaycanın dövlət bayrağı ilk dəfə 1918-ci il noyabrın 9-da hökumətin iclasında qəbul edilib və Azərbaycan Xalq Cümhuriyyəti Nazirlər Şurasının binası üzərində qaldırılıb. 1918-ci il dekabrın 7-də Azərbaycan Parlamentinin binası üzərində yeni dövlət bayrağı qaldırıldı.

Əfsuslar olsun ki, müsəlman Şərqində ilk demokratiya uzun sürmədi. 1920-ci il aprelin 27-də Azərbaycan Xalq Cümhuriyyətinin süqutuna qədər dövlət statusuna malik olan bayraq 1920-ci il mayın 3-də Sovet Rusiyası qoşunlarının Azərbaycanı işğalı nəticəsində Azərbaycan Parlamentinin binasından endirilib. Dövlət müstəqilliyini bərpa etdikdən sonra Azərbaycan Xalq Cümhuriyyətindən miras qoyduğumuz Azərbaycan bayrağı bizim üçün müqəddəs dövlətçilik atributlarından birinə çevrildi. 1990-cı il noyabrın 17-də Naxçıvan Muxtar Respublikası Ali Məclisinin Sədri, Azərbaycan xalqının Ümummilli Lideri Heydər Əliyevin təşəbbüsü ilə Azərbaycan Xalq Cümhuriyyətindən miras qalmış bayrağı Naxçıvan Muxtar Respublikasının dövlət bayrağı kimi təsdiq edildi. Eyni zamanda, Naxçıvan Muxtar Respublikasının Ali Məclisi bu bayrağın Azərbaycanın rəsmi dövlət rəmzi kimi tanınması barədə Azərbaycan SSR Ali Sovetinə vəsatət qaldırmışdır.

1991-ci il fevralın 5-də Azərbaycan Respublikasının Ali Soveti müraciətə baxaraq bu bayrağın yenidən Azərbaycanın Dövlət Bayrağı kimi qəbul edilməsi haqqında qərar qəbul olundu.

“Azərbaycan bayrağı sadəcə bir bayraq deyil. Bu, dövlətçiliyimizin, müstəqilliyimizin rəmzidir. Ona görə də hər bir Azərbaycan vətəndaşı bunu dərk etməli və dəyərləndirməlidir. Vətəndaşın bayrağa məhəbbəti onun Vətənə, xalqa, dövlətə sevgisi ilə bərabər olmalıdır!” – deyən Ulu Öndər Heydə Əliyev Azərbaycanın hələ SSRİ-nin tərkibində olduğu bir vaxtda bu qərarı verməsi baxımından Azərbaycanın üçrəngli bayrağının dirçəlişində rolunun tarixi əhəmiyyəti əvəzsizdir.

Azərbaycan tarixinin həlledici dövründə, respublikanın beynəlxalq təşkilatlara üzv qəbul olunduğu 1993-2003-cü illərdə dövlət bayrağımız bütün beynəlxalq təşkilatlarda qaldırılıb. 2009-cu il noyabrın 17-də Azərbaycan Respublikasının Prezidenti İlham Əliyev hər il noyabrın 9-nun ölkəmizdə Dövlət Bayrağı Günü kimi qeyd edilməsinə dair Sərəncam imzalayıb. Bayrağımız sonsuz qürurumuz və böyük şöhrətimiz, milli sərvətimiz, ömrümüz boyu qəlbimizdə yaşatdığımız müqəddəs sevgimizdir.

Dövlət Bayrağı Gününüz mübarək, Azərbaycan!

Milli Məclisin Komitə sədri, professor Hicran Hüseynova