Dörd kəndin Azərbaycana qaytarılması çərçivə sazişinin imzalanması perspektivini gücləndirəcək.
Teleqraf.com xəbər verir ki, bunu politoloq Elxan Şahinoğlu deyib.
Ekspert Ermənistanla Azərbaycan arasındakı son gəlişmələrə diqqət çəkib:
“Ermənistan baş naziri Nikol Paşinyan Tavuş bölgəsində yerli sakinlərlə görüşdə Azərbaycanın tələb etdiyi 4 kəndin qaytarılması zərurətini müharibə təhlükəsiylə ona görə izah edib ki, bununla bağlı Bakıdan xəbərdarlıq alıb. Mesajın mahiyyəti bu olub ki, yaxın günlərdə 4 kənd qaytarılmasa, Azərbaycan ordusu bu kəndlərə daxil olacaq. Həmin mesajı martın 7-də Azərbaycan baş nazirinin müavini Şahin Mustafayev erməni həmkarı Mqer Qriqoryana, o da öz növbəsində rəhbəri Nikol Paşinyana çatdırıb. Bunun qarşılığında Paşinyan bu məsələni qısa müddətdə həll edəcəyini vəd verib.
Paşinyan 4 kəndi Azərbaycana qaytarması qarşılığında rəsmi Bakıya öz təklifini göndərib: “Sərhədin delimitasiyasına Ermənistan tərəfdən Bağanıs, Azərbaycan tərəfdən Bağanıs Ayrım kəndi bölgəsindən başlayaq”.
Paşinyanın bu təklfinin arxasında nə dayanır?
Birincisi, Ermənistan baş naziri 4 kəndin Azərbaycana qaytarılmasını təmin etdikdən sonra həmin bölgədə Qazaxa aid 3 anklav mövzusunu “qapatmaq” istəyir. Çünki sərhədin həmin hissəsinin delimitasiyası razılaşdırılarsa, Azərbaycana məxsus 3 anklavın qaytarılması mümkün olmayacaq.
İkincisi, Nikol Paşinyan ümid edir ki, 4 kəndi Azərbaycana qaytardıqdan və sərhədin həmin hissəsi müəyyənləşəndən sonra sərhədin cənub hissəsindəki yüksəklikləri ala biləcək”.
Elxan Şahinoğlu hesab edir ki, Bakının Paşinyanın hər iki təklifinə razılıq verəcəyi ehtimalı azdır:
“Bakı İrəvandan birinci mərhələdə sülh və ya çərçivə sazişinin imzalanmasını tələb edir. Sülh əldə edildikdən sonra müxtəlif mövzuları bağlı danışıqları davam etdirmək olar. 4 kəndin geri qaytarılması çərçivə sazişinin imzalanması perspektivini gücləndirəcək”.