Vuçiç Bakıda Avropanı xəbərdar etdi: "Məcbur olacaqsınız..."

ABŞ-dan mayeləşdirilmiş təbii qaz (LNG) istehlak edən Avropa ölkələri Amerika hakimiyyəti resursun tədarükünü azaltdıqda Rusiyadan təbii qaz istəməyə məcbur olacaqlar.

Teleqraf.com xəbər verir ki, bunu Serbiya Prezidenti Aleksandr Vuçiç BMT-nin İqlim Dəyişikliyi Konfransının (COP29) 29-cu sessiyasında deyib .

Serbiya liderinin sözlərinə görə, bir müddət sonra ABŞ LNG ixracını dayandıracaq, çünki daha çox istehlak, süni intellekt və elektrik akkumulyatorları hesabına resurslara ehtiyacı olacaq.

“Biz hamımız növbəyə duracağıq, Rusiya qazını qadağan edənlər isə növbəyə durub Moskvadan xahiş edəcəklər: qazı bizə qaytarın”, - Vuçiç deyib.

Noyabrın 8-də Avropa Komissiyasının rəhbəri Ursula fon der Leyen ABŞ-ın gələcək prezidenti Donald Trampla ABŞ-dan mayeləşdirilmiş təbii qaz alışının artırılmasını müzakirə etmək istədiyini bildirib .