Azərbaycanlı ilahiyyatçı: “Məhəmməd Əli dəmirdən və arvadından yapışmışdı, dedi ki...”

Əfsanəvi boksçu Məhəmməd Əlinin vəfatından sonra ilahiyyatçı Elşad Miri sosial şəbəkədə onunla çəkdirdiyi fotosunu paylaşıb.

Elşad Miri Teleqraf.com-a bildirib ki, şəkil Amerika Birləşmiş Statlarının Kentukki ştatına çəkilib.

İlahiyyatçının sözlərinə görə, ABŞ-a səfərlərinin birində həmin ştatda olub: “Orada Məhəmməd Əlinin adını daşıyan bir mərkəzi var, mərkəzi ziyarət etdik. Azərbaycandan gələcəyimizi bildikləri üçün ölkəmizin bayrağı, Məhəmməd Əlinin islam dini haqqında sözləri, Qurandan ayələr video-rolikdə nümayiş olundu. Sonra bizə daha bir sürpriz hazırladıqlarını söylədilər.

Bir də gördük, əfsanəvi boksçu Məhəmməd Əli həyat yoldaşı ilə gəldi. Gözlərimizə inanmadıq. Xəstə olduğu üçün dəmirdən və həyat yoldaşından tutaraq otağa daxil oldu, söhbət etdik, şəkil çəkdirdik”.

Elşad Miri deyir ki, ona maraqlı gələn Məhəmməd Əlinin boksçu olmasına baxmayaraq məhz islam dinini seçməsi olub: “Başqasının üzünə-başına vuran, yıxan, nokauta salan birisinin müsəlmanlığı qəbul edəndən sonra keçirdiyi hissləri öyrənmək istədim. Özü danışmağa çətinlik çəkdiyi üçün fikirlərini həyat yoldaşı çatdırırdı.

Məhəmməd Əlinin bizə çatdırılan cümlələri bu idi: “Mən boksdan daha çox xeyriyyəçi insan olaraq tanınmaq istəyirəm. Bu, mənim arzumdur”. Əvvəllər döyüşərək uğur qazanan adam müsəlmanlığı insanlara fayda vermək məqsədi ilə seçmişdi.

Məhəmməd Əli müsəlman olandan sonra xeyriyyəçiyə çevrilib. Onun sayəsində dünyada islamı araşdırıb, qəbul edənlər də oldu. Belə bir insanla tanışlığa çox sevindim. Xəstəliyi ilə əlaqədar bəzən danışa-danışa yuxuya gedirdi. Bu cür hadisə insanı kədərləndirir”.

İlhamə ƏBÜLFƏT