“Taksilər üçün lisenziya alınması tələbi fərmanla ləğv olunub” - NAZİRLİK

İqtisadiyyat Nazirliyi son günlər bəzi kütləvi informasiya vasitələrində taksi fəaliyyəti üçün lisenziyanın tələb olunması barədə yayılan məlumata aydınlıq gətirib.

Nazirlikdən Teleqraf.com-a verilən məlumatda deyilir ki, son günlər bəzi KİV-də taksi fəaliyyəti üçün lisenziyanın tələb olunması barədə yanlış məlumatlar yayılır:

“İqtisadiyyat Nazirliyi bir daha xatırladır ki, Azərbaycan Respublikası Prezidentinin 2015-ci il 21 dekabr tarixli "Lisenziyalaşdırma sahəsində bəzi tədbirlər haqqında" Fərmanına və "Lisenziyalar və icazələr haqqında" 2016-cı il 15 mart tarixli Azərbaycan Respublikasının Qanununa əsasən, taksi fəaliyyəti üçün lisenziya alınması tələbi ləğv olunub.

Nazirlər Kabinetinin 2006-cı il 9 fevral tarixli Qərarına görə, taksi fəaliyyətini həyata keçirən şəxslər sadələşdirilmiş verginin ödənilməsi ilə bağlı Bakı şəhəri üzrə Bakı Nəqliyyat Agentliyindən, ölkənin digər ərazisində isə Nəqliyyat Nazirliyindən "Fərqlənmə nişanı" almalıdırlar.

İlhamə ƏBÜLFƏT