Kiprin iki ən reytinqli TV-sində - Heydər Əliyev

Kiprin iki ən reytinqli televiziya kanalında “Heydər Əliyev və Azərbaycan saatı” mövzusunda canlı yayım baş tutub.

Teleqraf.com xəbər verir ki, canlı yayım Şimali Kiprdə fəaliyyət göstərən Azərbaycan-Kipr Dostluq Cəmiyyəti (AKDC) tərəfindən həyata keçirilib.

AKDC-dən verilən məlumata görə, Kipr TV və Ada TV kanallarında yayımlanan verilişlərdə AKDC-nin diaspor sədri Orxan Həsənoğlu, Sankt- Peterburqda fəaliyyət göstərən Smolnı Universitetinin rektoru, Akademik Heydər İmanov və AKDC-nin sədr müavini Fuad Səfərəliyev iştirak edib.

Diaspor fəallarımız ulu öndər Heydər Əliyevin keçdiyi şərəfli həyat yolu və uğurlu fəaliyyətindən, onun xalqımızın həyatındakı önəmindən bəhs ediblər.

Hər kanalda bir saatdan artıq yayımlanan verilişlərdə eyni zamanda Azərbaycanın Dağlıq Qarabağ problemi və ölkəmizin sosial-iqtisadi inkişafı haqqında tamaşaçılara geniş məlumatlar verilib.

AKDC sədri Orxan Həsənoğlu bildirib ki, AKDC hər zaman ölkəmizin tarixi və əlamətdar günləri ilə bağlı Kipr mediasında Azərbaycanın təbliğatı ilə bağlı davamlı layihələr həyata keçirir və bundan sonra da bu istiqamətdə fəaliyyət davam edəcək.

Pərvin