Bu gün Qəbələdə Beynəlxalq Mürəbbə Festivalı keçirilir

Bu gün Qəbələ Rayon İcra Hakimiyyətinin təşkilatçılığı, Mədəniyyət və Turizm Nazirliyinin, Azərbaycan Milli Kulinariya Mərkəzi, Azərbaycan Milli Kulinariya Assosiasiyasının dəstəyi ilə V Qəbələ Beynəlxalq Mürəbbə Festivalı keçirilir.

Teleqraf.com xəbər verir ki, “Qafqaz Karvansaray” otelinin qarşısındakı parkda təşkil olunan bayram tədbirində dünyanın 22 ölkəsindən komandaların iştirakı gözlənilir.

Həmçinin mərasimdə Azərbaycanın 44 şəhər və rayonunda əl əməyi və sənaye üsulu ilə hazırlanan mürəbbələr nümayiş olunacaq. Hər bir iştirakçı 8 növ mürəbbə ilə təmsil olunur.

Festivalda mürəbbə məhsullarının və əl işlərinin sərgisi də təşkil olunacaq. Festivalın rəsmi açılış mərasimi saat 12:00–da başlayacaq. Tədbirdə Ümumdünya Kulinariya Təşkilatı (WAKS)-ın prezidenti Tomas Guglerin də iştirakı gözlənilir. Hazırda festivala son hazırlıq işləri görülür, sərgi masalarına mürəbbələr və digər məhsulların düzülməsi prosesi gedir.