Bakıdan Sofiyaya ilk birbaşa aviareys açıldı - Foto

Yanvarın 16-da Bakıdan Sofiyaya ilk birbaşa aviareys açılıb.

Teleqraf.com xəbər verir ki, ilk birbaşa aviareysin açılışında Azərbaycanın Baş naziri Artur Rasi-zadə və ölkəmizdə işgüzar səfərdə olan Bolqarıstanın Baş naziri Boyko Borisov iştirak ediblər.

Azərbaycan Hava Yolları Qapalı Səhmdar Cəmiyyətinin (AZAL) vitse-prezidenti Eldar Hacıyev tədbirdə çıxış edərək Heydər Əliyev Beynəlxalq Aeroportu barədə məlumat verib. O bildirib ki, aeroportun yeni aerovağzal kompleksi 2014-cü ilin aprel ayında istifadəyə verilib. Onun ümumi sahəsi 65 min kvadratmetrdir. 2017-ci ildə aeroport 4 milyondan çox sərnişinə, 55 aviaşirkətə xidmət göstərib. Eldar Hacıyev Bakı-Sofiya aviareysini həyata keçirən “Buta Airways” loukosteri barədə də məlumat verib.

AZAL-ın vitse-prezidenti bildirib ki, dünyada müxtəlif aviaşirkətlər və hava limanları tərəfindən göstərilən xidmətlərin keyfiyyətinin öyrənilməsi üzrə ixtisaslaşan Böyük Britaniyanın nüfuzlu konsaltinq “Skytrax” şirkəti Heydər Əliyev Beynəlxalq Aeroportunu 4 ulduza layiq görüb. Ötən il Heydər Əliyev Beynəlxalq Aeroportu Rusiya və MDB ölkələrinin bütün hava limanları arasında göstərilən xidmət səviyyəsinə görə ən yaxşılar siyahısına başçılıq edərək “Skytrax World Airport Awards” mükafatına layiq görülüb.

Azərbaycanın Baş naziri Artur Rəsizadə və Bolqarıstanın Baş naziri Boyko Borisov jurnalistlərə açıqlamalarında Bakıdan Sofiyaya ilk birbaşa aviareysin əhəmiyyətindən danışıblar. Bildirilib ki, bu, Bolqarıstanla Azərbaycan arasında iqtisadi, xüsusən də turizm sahəsində əlaqələrin inkişafına mühüm töhfə verəcək.

Xatırladaq ki, Bakı və Sofiya arasında birbaşa aviareysin açılması barədə razılaşma Azərbaycan Prezidenti İlham Əliyev və Bolqarıstan Prezidenti Rumen Radev arasında danışıqlar çərçivəsində əldə olunub.

Bolqarıstanın paytaxtı Sofiya Avropa İttifaqında Azərbaycanın ilk loukosteri “Buta Airways”in birbaşa uçuşlar yerinə yetirəcəyi ilk şəhərdir. Uçuşlar həftədə bir dəfə çərşənbə axşamları həyata keçiriləcək.