Bakıda Netanyahunun pyesinin premyerası oldu – Foto

Beynəlxalq Muğam Mərkəzində tanınmış İsrail yazıçı-dramaturqu İdo Netanyahunun eyniadlı pyesi əsasında səhnələşdirilmiş “Məna axtarışında” tamaşasının premyerası olub.

Teleqraf.com xəbər verir ki, tamaşaçılar yaradıcı kollektivin üzvlərini – dramaturji cəhətdən mürəkkəb olan bu pyesi səhnədə uğurla təcəssüm etdirən rejissor İlqar Səfət, xalq artistləri Lyudmila Duxovnaya və Məbud Məhərrəmov, aktyorlar Azər Aydəmir və Rumiyə Ağayevanı sürəkli alqışlarla qarşılayıblar.

Tamaşanın premyerasında İsraildən bu əlamətdar hadisə üçün Bakıya gəlmiş pyesin müəllifi İdo Netanyahu (İsrailin hazırkı Baş naziri Benyamin Netanyahunun qardaşı) və xanımı iştirak ediblər.

Beynəlxalq əlaqələr üzrə ekspert, İsrailin “Cəmiyyət üçün beynəlxalq layihələr” təşkilatının rəhbəri Arye Qut qeyd edib ki, İsraillə Azərbaycan arasında strateji münasibətlərin tarixində ilk dəfə olaraq Beynəlxalq Muğam Mərkəzində tanınmış İsrail dramaturqunun pyesi səhnələşdirilib:

“İsrail vətəndaşı kimi minnətdarlıq və qürur hissi ilə qeyd edirəm ki, Azərbaycanın rəhbərliyi ölkədə yaşayan bütün icmaların, o cümlədən yəhudi icmasının adət-ənənələri və həyatına dünyada analoqu olmayan qayğıkeş və səmimi münasibət göstərir. Odlar yurdunda əsrlərdən bəri azərbaycanlılar və yəhudilər qardaş kimi yaşayır, onları ortaq tarix və tale birləşdirir.

Bu pyesin tamaşası növbəti mədəniyyət körpüsü, xalqlarımız və ölkələrimiz arasında əlaqələrin inkişafına yeni təkandır”.

Tamaşanın quruluşçu rejissoru İlqar Səfət “Nərimanfilm” kinostudiyasının dəstəyi ilə həyata keçirilən bu layihəni mühüm mədəniyyət hadisəsi adlandırıb: “Tamaşanın baş qəhrəmanı tanınmış psixoloq, görkəmli alim Viktor Frankldır. O, Holokost dəhşətlərini yaşayıb, dörd faşist düşərgəsinin əzablarından keçib və psixologiyada loqoterapiya kimi güclü istiqamət yaradıb. Xocalı soyqırımını yaşayan Azərbaycan xalqı Holokost faciəsini çox yaxşı anlayır”.

İsrailin Azərbaycandakı səfiri Dan Stav ölkələrimiz arasında münasibətlərin yüksək strateji səviyyədə olduğunu vurğulayıb:

“Tanınmış İsrail dramaturqu İdo Netanyahunun bu pyesinin tamaşası mühüm tarixi hadisədir. Biz bu pyesdə mənim xalqımın keçdiyi ağır sınaqları və yaşadığı faciələri Viktor Franklın həyat prizmasından anlaya biləcəyik. Biz Azərbaycanın İkinci Dünya müharibəsində faşizm üzərində qələbədə böyük rolunu və verdiyi töhfəni heç bir zaman unutmayacağıq”.

Premyeradan sonra İdo Netanyahu gördüyü səmimi münasibətə və qonaqpərvərliyə görə təşəkkürünü bildirib: “Mən çox gözəl quruluşa görə rejissor İlqar Səfətə, həmçinin mənim xalqımın faciəsini ustalıqla tamaşaçılara çatdıran aktyorlara təşəkkür edirəm.

Azərbaycan rəhbərliyinin yəhudi icmasına diqqət və qayğısını çox yüksək qiymətləndirirəm. Bu, dünyada dialoq və qarşılıqlı anlaşmanın örnəyi kimi qəbul oluna bilər. Hamınıza təşəkkür edirəm Qoy dünyada bir daha müharibələr olmasın”.