Rejim həmsədrlərin son bəyanatına kölgə salır – İcma sədri

Dağlıq Qarabağın Azərbaycanlı İcması İctimai Birliyinin rəhbəri Tural Gəncəliyev ATƏT-in Minsk Qrupu həmsədrlərinin sonuncu bəyanatı ilə bağlı Azərbaycanın işğal edilmiş ərazilərində yaradılmış qondarma rejimin “xarici işlər nazirliyi”nin “nümayəndəsi”nin açıqlamasına cavab verib.

Teleqraf.com xəbər verir ki, icma rəhbəri işğal edilmiş Azərbaycan ərazilərində yaradılan qondarma rejimin “xarici işlər nazirliyi”nin “nümayəndəsi”nin ATƏT-in Minsk Qrupu həmsədrlərinin sonuncu bəyanatına kölgə salmaq, Ermənistan-Azərbaycan, Dağlıq Qarabağ münaqişəsinin tənzimlənməsi ilə əlaqədar aparılan danışıqlara xələl gətirmək və diqqəti danışıqların predmetindən yayındırmaq məqsədilə növbəti əsassız açıqlama verdiyini bildirib.

Onun sözlərinə görə, qondarma “nümayəndə” ATƏT-in Nazirlər Şurasının Helsinki və Budapeşt sammitlərində qəbul edilmiş sənədlərlə bağlı cəfəng dolu iddialar irəli sürməklə beynəlxalq ictimaiyyəti çaşdırmağa cəhd göstərib:

“Qarşı tərəfin “nümayəndəsi” Helsinki sammitinin sənədlərinə əsasən münaqişənin tərəfləri (təcavüzkar Ermənistan və hərbi işğala məruz qalmış Azərbaycan) ilə yanaşı, maraqlı tərəflər qismində yalnız Azərbaycanın Dağlıq Qarabağ bölgəsinin erməni icmasının mövcudluğundan danışıb, azərbaycanlı icmasını görməməzlikdən gəlirsə, onun sözügedən sənədin məğzini dərk etmək qabiliyyətinin olmaması yalnız təəssüf hissi doğurur.

Qondarma “rəsmi şəxs” əgər Budapeşt sammitinin sənədindən danışırsa və bu sənədin öhdəliklərinə sadiqdirsə, onda sənədə tam şəkildə əməl etməlidir. 1994-cü il Budapeşt sammitində iştirakçı ölkələrin dövlət və hökumət başçıları səviyyəsində qəbul olunmuş sənəddə isə deyilir: “ATƏT-in iştirakçı ölkələrinin dövlət və hökumət başçıları BMT Təhlükəsizlik Şurasının müvafiq qətnamələrinə dair öhdəliklərini təsdiq edərək tərəfləri intensiv substantiv danışıqlara, silahlı münaqişənin dayandırılması üçün siyasi sazişin bağlanması məqsədilə sürətli şəkildə danışıqların davam etdirilməsinə çağırırlar”.

T.Gəncəliyev xatırladıb ki, BMT TŞ-nin 1993-cü il tarixli 853 və 884 saylı qətnamələrində məhz “Azərbaycan Respublikasının Dağlıq Qarabağ bölgəsinin erməniləri”nə istinad edilir və bu da öz növbəsində ATƏT-in müvafiq qərarlarında, o cümlədən Minsk Qrupu həmsədrlərinin sonuncu bəyanatında qeyd edilən “maraqlı tərəflər” ifadəsini özündə ehtiva edir:

“Qeyd olunanlarla bərabər, 1994-1995-ci il atəşkəs haqqında müzakirələrin tərkib hissəsi olan 1995-ci ilin 5 noyabr tarixli “Xüsusilə işğal olunmuş ərazilərdə vəziyyətin tənzimlənməsinə dair tədbirlərin vaxt cədvəli” adlı II saylı əlavəni qeyd etmək lazımdır. Bu sənəddə konkret şəkildə müvafiq vaxt cədvəlinə uyğun olaraq Azərbaycanın işğal edilmiş Ağdərə, Ağdam, Xocavənd, Füzuli, Cəbrayıl, Zəngilan, Qubadlı, Kəlbəcər və Laçın rayonlarından qoşunların çıxarılması və minalardan təmizləmə əməliyyatı barədə tədbirlər nəzərdə tutulur. Azərbaycanın Dağlıq Qarabağ bölgəsinin erməni icması Sərkisyan-Köçəryan xuntasının davamı olan işğalçı rejimin əsarətində qalmaqda davam edir. Bölgədə daimi və ədalətli sülhün bərqərar olmasının yeganə yolu işğalçı Ermənistan qoşunlarının Azərbaycan ərazilərindən çıxarılması və oradan qovulmuş azərbaycanlı əhalinin öz torpaqlarına geri dönüşü ilə mümkündür. Azərbaycan Respublikasının Dağlıq Qarabağ bölgəsinin azərbaycanlı icmasının üzvləri Dağlıq Qarabağın azərbaycanlı və erməni icmalarının ölkəmizin beynəlxalq səviyyədə tanınmış sərhədləri, suverenliyi və ərazi bütövlüyü çərçivəsində yenidən sülh şəraitində birgə yaşamağa qadir olduqlarına inanır və bu məqsədlə dialoqa hazırdır”.