BMT İnkişaf Proqramının rəhbəri Səlim Müslümovla görüşüb

Əmək və Əhalinin Sosial Müdafiəsi Nazirliyinin (ƏƏSMN) Sumqayıt şəhərində yaradılmış SYSLAB Təlim Tədris Mərkəzində ölkəmizdə səfərdə olan BMT İnkişaf Proqramının rəhbəri xanım Helen Elizabet Klark ilə görüş keçirilib.

ƏƏSMN-nin ictimaiyyətlə əlaqələr şöbəsindən Teleqraf.com-a verilən məlumata görə, görüşdə Azərbaycan Respublikasının BMT yanında daimi nümayəndəsi Yaşar Əliyev də iştirak edib.

Əmək və əhalinin sosial müdafiəsi naziri Səlim Müslümov bildirib ki, ƏƏSMN ilə BMT İnkişaf Proqramının birgə “Azərbaycanda İnnovasiyanın və Məşğulluğun İnkişafı” layihəsi çərçivəsində yaradılan bu mərkəzdə məşğələlər maksimum 4 ay davam edir. Hər həftənin 5 günü keçirilən məşğələlərdə iştirakçılar SYSLAB təlimləri əsasında müasir işaxtarma üsullarına yiyələnir və tezliklə iş tapmağa nail olurlar. Layihə üzrə müxtəlif işədüzəltmə agentlikləri, özəl və dövlət müəssisələri ilə də əlaqələr qurulur, ekspertlər məşğələlərə dəvət olunaraq onların iştirakçılarla görüşləri keçirilir. Layihə müddətində iştirakçıların məşğulluq orqanları tərəfindən təşkil edilən Əmək yarmarkalarında, habelə beynəlxalq təşkilatların təşkil etdikləri Təhsil və Karyera sərgilərində iştirakı da təmin edilir.

Nazir deyib ki, ƏƏSMN ilə BMT İnkişaf Proqramının birgə layihəsi olan “Azərbaycanda İnnovasiyanın və Məşğulluğun İnkişafı” layihəsi bunun bir ifadəsidir: “Norveç SYSLAB şirkətinin və BMT İnkişaf Proqramının maliyyə dəstəyi ilə fəaliyyətə başlayan bu layihə üzrə 2011-ci ildə Bakıda, 2013-cü ildə Sumqayıtda, bu il isə Gəncədə SYSLAB Təlim Tədris Mərkəzləri yaradılıb. Bu mərkəzlər işsiz və işaxtaran vətəndaşların innovativ metodlar əsasında iş axtarışı bacarıqlarının təkmilləşməsinə, onların əmək bazarına inteqrasiyasına öz töhfəsini verir”.

Nazir bildirib ki, bu mərkəzlərdə 376 işsiz və işaxtaran şəxs motivasiya, təqdimatlar keçirmək bacarıqları, komanda işi, fərdi bacarıqların təhlili, telefon danışığı texnikası, CV və rezume yazılışı, müsahibə bacarıqları üzrə təlimlərdən bəhrələnib. Artıq onların 298 nəfəri və ya 80 faizi yeni qazandıqları bacarıqlardan istifadə edərək müxtəlif dövlət qurumlarında, özəl müəssisələrdə iş tapıblar: “Hesab edirəm ki, əldə olunan müsbət nəticələr cari ilin sonunda yekunlaşması nəzərdə tutulan bu layihənin gələcəkdə də davam etdirilməsinə əsas yaradır”.

Helen Elizabet Klark isə ƏƏSMN ilə birgə əməkdaşlığın arzuolunan nəticələr verdiyini vurğulayıb, iş bacarıqlarını bu və ya digər fəaliyyət sahəsində reallaşdırmaq, əmək bazarına daxil ola bilmək və karyera imkanları əldə etmək üçün bu layihənin yaxşı imkanlar açdığını diqqətə çatdırıb. O, bu istiqamətdə işlərin davam etdirilməsinin və SYSLAB şəbəkəsinin daha da genişləndirilməsinin məqsədəuyğun olduğunu bildirib. Görüşdə gələcək əməkdaşlıq məsələləri barədə fikir mübadiləsi aparılıb.

Naibə