Hande Harmançı danışdı: "ÜST olaraq imkanlarımız məhduddur..."

Bir neçə gün əvvəl fenilketonuriya daşıyıcısı qohumları olan bir xanım bu mövzuda məndən kömək istədi. Təəssüf ki, ÜST olaraq edə biləcəklərimiz məhduddur. Bəlkə kömək olacağını düşündüyüm üçün burada yazmaq qərarına gəldim.

Teleqraf.com xəbər verir ki, bunu Ümumdünya Səhiyyə Təşkilatının (ÜST) Azərbaycandakı nümayəndəsi Hande Harmancı sosial şəbəkə hesabında yazıb.

O bildirib ki, Azərbaycanda bütün yeni doğulan körpələrdə fenilketonuriya xəstəliyinin müayinəsinə başlamaları üçün əllərindən gələni edəcəklər:

"Fenilketonuriya əqli qüsur və davranış/psixi pozğunluqlar yaradan genetik xəstəlikdir. Xüsusilə qohum evliliklərində baş verən problemdir. Lakin doğuş zamanı sadə bir testlə diaqnoz qoymaq mümkündür və düzgün qidalanma ilə bütün bu çətinliklərin qarşısını almaq olar".

Hande Harmancı qeyd edib ki, dünyada bu xəstəlik ortalama statistikaya görə hər yeni doğulan 6 faizində aşkarlanır: "Xəstəliyin daşıyıcısı olan ən çox uşaq Türkiyədədir ki, onların sayı 38 faiz təşkil edir. Ən az müşahidə olunan ölkə isə Tailanddır, 0.3 faiz. Düşünürəm ki, Azərbaycandakı evliliklər də Türkiyəyə bənzəyir. Qlobal statistikaya nəzər salsaq, Azərbaycanda hər il bu xəstəliklə 10 körpə doğulur, Türkiyədə isə 58 körpədə bu xstəlik aşkarlanır".

ÜST nümayəndəsinin sözlərinə görə, bu körpələr üçün xüsusi qidalar tələb olunur: "O qidaları tapmasalar, beyin zədəsi inkişaf edir. Bilirəm ki, Azərbaycanda bu qidaların mövcudluğu ilə bağlı problemlər var. Ümid edirəm ki, bu kiçik, lakin çox vacib qrupun səslərinə bir az töhfə verə bilərəm".