7 Avqust 11:36
934

“Ötən gün Prezidentin keçirdiyi müşavirədə səsləndirdiyi iradlar və çəkdiyi adlar ürəyimə su səpdi. Demişdim adlar çəkəcəm və Prezidentin dünənki çıxışından sonra artıq bunu daha sərbəst edə bilərəm. Axı neçə illərdir ki, bu məsələlər deyilirdi, nəticə isə yox idi. Artıq çox şey dəyişməlidir və vəzifəsini dürüst icra etməyənlər kreslolarını, bir zəhmət boşaltsınlar. Dövlət Neft Şirkətinin vəzifəsi neftdən qazanılan pulları xalqın rifahı üçün xərcləməkdir. Neft şirkətinin nə deputatları, nə də xalqın nümayəndələrini ağ və qara dəriliyə bölməyə ixtiyarı yoxdur. İmişlinin 10 kəndi qazlaşmayıb, camaat çıxıb yolu da bağlayır, vecinə alan yox. Məgər on il ərzində bir-iki kəndi qazlaşdırmağı plana salmaq olmazdı? Olardı, amma sərf etmir. Çünki bütün məsələlərə hesab və kitabla baxılır və bu hesab-kitabın adı əyri yollar, işlər və ziqzaqlı korrupsiya piramidasıdır. Hörmətli Rövnəq müəllim heç telefonu açmır. Nəticəsi isə artıq görünür ki, çox ağır olacaq. Amma Rövnəq müəllim bilsin ki, mən çıxışımın sərtliyini 70% azaltdım və bunu bir sıra dostlarımın və həmkarlarımın xətrinə edirəm”.

Teleqraf.com xəbər verir ki, bunu deputat Razi Nurullayev Milli Məclisin bugünkü plenar iclasında çıxışı zamanı deyib.

R.Nurullayev AZAL-la bağlı da məsələyə münasibət bildirib:

“Hörmətli deputatlar, Azərbaycan xalqı, xaricə tez-tez səfər edən insanlar nəyə görə Gürcüstana gedib, həmin ölkələrə ordan uçmalıdır? Vətəndaşlarımız Azərbaycan dövlətinin, yəni Azərbaycan xalqının pulu ilə alınan təyyarələrlə niyə uçmamalıdır? Nədir-nədir, təyyarələr bahalıdır, təmizdir, yeyib-içmək verirlər və sairə. Cahangir müəllim, bu xalq çirkli təyyarədə də uçar, evindən apardığı yeməkləri yeyər, narahat kreslodada oturar. Guya 2-3 saat rahat kresloda otursa, həyatı dəyişəcək? Həyatı dəyişənlər sizlərsiniz. Dövlətin büdcəsi ilə özünüzə biznes qurmusunuz və dövlətin şirkətlərini də şəxsi firmanız kimi idarə edirsiniz. Bu, biabırçılıqdır. Dövlət şirkətləri dövlətin büdcəsini talamaq üçün növbəyə durub. Siz pul qazanıb kreditlərinizi ödəmələsiniz, hələ dövlətə vergi də verməlisiniz. Qiymətlər göyün yeddinci qatında, hər kəs də digər aviaşirkətlərlə uçur və elə hallar olub ki, siz təyyarədə 2-3 nəfərlə ancaq elə özünüz uçmusunuz. Kimin pulu ilə? Cavab verin”.

Razi Nurullayev sonra qeyd edib ki, “Azərsu”, Meliorasiya və Su Təsərrüfatı Açıq Səhmdar Cəmiyyəti ilə hesabını isə bir neçə gün sonraya saxlayıb:

“Vaxt azdır, amma bəzi sənədləri əldə etmək istəyirəm, mütləq o sənədləri əldə edəcəm və canlı yayımda nümayiş etdirəcəm".


Müəllif: Cavad