Tələbələr universitetin yataqxanasında günü 1 manata qalırlar – Rektor

Gəncədə yerləşən Azərbaycan Dövlət Aqrar Universitetində jurnalistlər üçün məlumatlandırma sessiyası keçirilir.

Teleqraf.com xəbər verir ki, universitetin rektoru İbrahim Cəfərov 2009-cu ildən bu ali məktəbin aqrar universitet statusunda fəaliyyət göstərdiyini bildirib.

O qeyd edib ki, hər il universitetə 1300 nəfər qəbul olunur. İxtasasların təxminən 80 faizi dövlət sifarişlidir. Hazırda universitetdə 32 ixtisas üzrə tələbə qəbulu həyata keçirilir. Həmçinin, universitetdə 350 nəfərdən artıq əcnəbi tələbə təhsil alır. Bu tələbələr 12 dövləti təmsil edirlər. Bunlar Türkiyə, İraq, Qazaxıstan, Afrika ölkələri, Qoşulmama Hərəkatına üzv ölkələrdən olan tələbələrdir.

İbrahim Cəfərov deyib ki, son illərdə 150 nəfər müəllim işə qəbul olunub.

Rektor bildirib ki, əvvəllər bu ali məktəbə maraq az idi. Lakin ölkədə aqrar sahə prioritet hesab olunandan, böyük fermer təsərrüfatları yaranandan sonra ADAU-ya maraq böyükdür: “Son 5 ildə cənab prezident 3 dəfə Aqrar Universitetdə olub. Bizim tədris korpumuz nəinki MDB məkanında, Şərqi Avropada ən böyük tədris korpuslarından biridir”.

Rektor tələbələrin universitetin tələbə yataqxanasında günü 1 manata qaldıqlarını deyib: “Beləliklə, onların il ərzində qalma xərci cəmi 350 manatdır. Bu gün bizim 9 tədris korpusumuz var. Onlardan bir neçəsi universitetin kampusundan kənarda yerləşir. Bu gün Aqrar Universitetdə 4 tələbəyə bir kompüter düşür. Bir neçə il əvvəl Təhsil Nazirliyi tərəfindən açıqlanan statistikaya görə 28 tələbəyə bir kompüter düşürdü. Hazırda universitetdə 100-dən artıq ağıllı lövhə var”.

İbrahim Cəfərov deyib ki, universitetdə təhsilin keyfiyyətini yüksəltmək istiqamətində böyük addımlar atılır: “Bu gün bizim 5 istixanamız, balıqçılıq təsərüfatımız, digər müəssisələrimiz var. Yığılan məhsul tələbələrin qidalanmasına sərf olunur”.

Rektor onu da bildirib ki, ötən tədris ilində magistr qəbul planı 94, bakalavr qəbul planı 83-84 faiz faiz yerinə yetirilib. Xarici tələbələrin təhsil haqqı 2000 dollardır. İbrahim Cəfərov qeyd edib ki, universitetdə ingilis dilinin tədrisinə böyük önəm verilir.