Qubada İctimai Birliyin ekoloji layihəsi başa çatdı

“Demokratik İnkişafın Təşviqi” İctimai Birliyi Quba rayonu Heydər Əliyev Mərkəzində “Sözdən Əmələ” – İctimai yerlərdə zibil qutularının birgə monitorinqi və aşkarlanan problemlərin müzakirəsi” layihəsi çərçivəsində tədbir keçirib.

Qeyd edək ki, layihə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilir.

Tədbiri Quba rayon İcra Hakimiyyətinin Sosial-İqtisadi İnkişafın Təhlili və Proqnozlaşdırılması Şöbəsinin baş məsləhətçisi Fərid Əhmədxanov açaraq, qonaqları salamlayıb.

Daha sonra layihə rəhbəri Çingiz Dadaşov çıxış edərək, öncə təşkilat barədə məlumat verib. Bildirib ki, “Demokratik İnkişafın Təşviqi” 2003-cü ildə yaranıb. Sonra layihənin əsas mahiyyəti ilə bağlı məlumat verib. Bildirib ki, əsas mövzu vətəndaşların ictimai yerlərin təmizliyinin qorunmasında şəxsən iştirakıdır. Zibil qutuları məhdud sayda olan ərazilərdə buna əməl etmək daha vacibdir.

Daha sonra layihənin eksperti Şaban Nəsirov çıxış edib. Qeyd edib ki, aparılan monitorinqlər şimal rayonlarında ekoloji durumun yaxşı olduğunu, şəhər və rayon mərkəzlərində təmizliyə ciddi riayyət olunduğunu ortaya qoyur: “Bu sahə hökumətin də diqqət mərkəzindədir. Mən 15 ildir ki, ictimai sektordayam, elə bir il olmayıb ki, ekoloji sahədəki layihələrə vəsait ayrılmasın”.

Ekspert şimal rayonlarının, o cümlədən də Qubanın turizm bölgəsi olduğunu vurğulayıb və qeyd edib ki, turizm imkanlarının genişlənməsi həm də ekoloji durumdan asılıdır.

Şaban Nəsirov sonra son illərin vacib ekoloji problemi olan polietilen torbalarla çirklənmədən danışıb. Qeyd edib ki, torpaq üzərində çürüməsi üçün 100 ilə qədər bir müddət tələb olunan polietilen torbalar insan orqanizmi üçün əsl təhlükədir. Onlar zaman keçdikcə kimyəvi şüalanma yaradır.

Sonda Çingiz Dadaşov tədbirin keçirilməsində göstərdiyi dəstəyə görə Quba Rayon İcra Hakimiyyətinin başçısı Ziyəddin Əliyev və İH-nin nümayəndəsi Fərid Əhmədxanova öz təşəkkürünü bildirib.