Elçibəyin yubileyi ilə bağlı tədbirlər keçiriləcək

Milli Azadlıq hərəkatının lideri, Azərbaycan Respublikasının eks-prezidenti Əbülfəz Elçibəyin anadan olmasının 85 illiyi ilə bağlı Bakıda, Avropanın bir sıra şəhərlərində və doğulduğu Kələki kəndində bir sıra tədbirlər keçirilməsi nəzərdə tutulub.

Teleqraf.com xəbər verir ki, bu barədə tədbirləri təşkil edən Milli Hərkatçılar Birliyiyində (MHB) yaradılmış Təşkilat Komitəsi tərəfindən açıqlama verilib.

Komitənin yaydığı açıqlamada bildirilir ki, MHB Yüksək Məclisi bu ayın əvvəlindən keçirdiyi onlayn tədbir və müzakirələr nəticəsində qərar qəbul edib. Silsilə tədbirlərin keçirilməsi ilə bağlı plan hazırlanıb. Bu planda aşağıdaki tədbirlər nəzərdə tutulur:

İlk olaraq, Elçibəyin xatirəsinə həsr edilmiş Gənclər Arasında Şahmat Turniri 22 iyun, saat 11:45-də, Bakı şəhərində keçiriləcək.

Növbəti tədbir, yenə həmin tarixdə, 22 iyun saat 21:00-da Elçibəyin həyat və fəaliyyətinə həsr edilmiş virtual konfrans şəklində baş tutacaq.

İyun ayının 23-də, saat 15:00 da, Bakı şəhərində ABP-nin (Azərbaycan Bütövlük Platforması) əsas təşkilatçılığında, ABP-MHB funksionerlərinin və qonaqların iştirakı ilə “Azərbaycan tarixində və müasir ictimai-siyasi həyatında Elçibəyin rolu və yeri” adlı konfrans öz işinə başlayacaq.

Tədbirlər silsiləsi çərçivəsində Milli Hərəkatçılar və Elçibəyin silahdaşları iyun ayının 24-ü saat 13:00-da Fəxri Xiyabanda Elçibəyin məzarını ziyarət edəcəklər. Daha sonra Bakı və regionlardan hərəkatçıların, siyasətçilərin, ictimai xadimlərin və ziyalıların iştirakıyla geniş salon toplantısı keçiriləcək. MHB Yönətim Kurulu Başkanı İstanbul Mərmərə Universitetinin müəllimi Arif Acalov tədbirlərdə iştirak etmək üçün artıq Bakı şəhərindədir.

Avropanın bir sıra şəhərlərində, o cümlədən Almaniya və İsveçrədə yaşayan MHB üzvləri də hər il olduğu kimi, 24 iyunda Elçibəyin doğum gününü çeşidli yığıncaq və tədbirlərə qeyd edəcəklər.

Bu il də Elçibəyin doğulduğu Kələki kəndində “Doğum günü münasibəti ilə açıq hava toplantısı” keçiriləcək. Toplantıda respublikanın bir çox yerindən, o cümlədən Naxçıvan Muxtar respublikasının bütün rayonlarından qonaqların iştirakı gözlənilir.

Xatırladaq ki, bu ənənəvi tədbir hər il olduğu kimi bu il də saat 11:00 da Elçibəyin Kələkidəki “Ev Muzeyi”nin ziyarəti ilə başlanacaq.