Yaponiyalı politoloq QMİ-də olub

Bu gün Yaponiyanın Hosey Universitetinin professoru, Rusiya və MDB siyasəti və tarixi üzrə məşhur politoloq Nobuo Şimotomay Qafqaz Müsəlmanları İdarəsində olub.

İdarədən Teleqraf.com-a verilən məlumata görə, qonağı QMİ sədrinin birinci müavini Salman Musayev və sədr müavini Fuad Nurullah qəbul ediblər.

Azərbaycanda müsəlmanların və digər dinlərə mənsub olan vətəndaşların həyatı, habelə QMİ-nin çoxşaxəli fəaliyyəti haqqında geniş məlumat alan qonaq Azərbaycana səfərindən və bu görüşdən böyük məmnuniyyətini dilə gətirib.

Cənab Şimotomay QMİ rəhbərlərinə Mərkəzi və Şərqi Avropa araşdırmaları üzrə Beynəlxalq Şuranın (MŞAABŞ) 9-cu qurultayının cari ilin avqust ayında Yaponiyanın Makuhari şəhərində keçiriləcəyi barədə məlumat verib.

Görüşdə Yaponiyanın Azərbaycandakı Səfirliyinin nümayəndəsi T.Katagiri və QMİ əməkdaşı G.Babayev iştirak ediblər.

BƏXTİYAR