“Gənclər Debat Forumu: Olimpiya Kuboku“nun yekun mərhələsi keçirildi

Lənkəran şəhərində DVC (“Vətəndaş Cəmiyyətində Debat” İctimai Birliyi) tərəfindən Azərbaycan Respublikası Prezidenti yanında Gənclər Fondunun dəstəyi ilə həyata keçirilən “Gənclər Debat Forumu: Olimpiya Kuboku” layihəsinin yekun mərhələsi baş tutub.

Teleqraf.com xəbər verir ki, tədbir zamanı “Gənclər Debat Forumu: Olimpiya Kuboku”nun Bakı, Gəncə, Şəki şəhərlərində həyata keçirilən mərhələləri nəticəsində seçilmiş gənc natiqlər yekun debat raundlarında iştirak ediblər.

Həyata keçirilən debat raundlarının nəticəsində Bakı şəhərininin komandası Forumun qalibi və bu şəhəri təmsil edən Cavid Abdullayev Forumun ən yaxşı natiqi adına sahib olub.

“Gənclər Debat Forumu: Olimpiya Kuboku” layihəsinin məqsədi “Bakı 2015” Avropa Oyunları ərəfəsində mövzu ilə əlaqədar gənclər arasında təbliğatın aparılması, gənclərin Avropa Oyunları mövzusunda biliklərinin artırılması olub.

Forum çərçivəsində həyata keçirilən debatlarda gənclər Avropa Oyunlarının Azərbaycan iqtisadiyyatına verdiyi faydaları müzakirə ediblər.

DVC-nin sədri Seymur Hüseynov qeyd edib ki, “Avropa Oyunlarının Azərbaycanda keçirilməsi ilə bağlı cəmiyyətdə həm müsbət, həm də mənfi fikirlər mövcuddur. Layihə çərçivəsində gənclər araşdırma və debatlar metodologiyası vasitəsi ilə Avropa Oyunlarının Azərbaycana verdiyi faydaları ortaya çıxardılar və nəyə görə Oyunların ölkə səviyyəli prioritet olmasını anladılar. Hamımız üçün aydındır ki, Oyunlar çərçivəsində görülən işlər, infrastruktur obyektlərinin tikintisi, yolların bərpası, üç və dörd ulduzlu mehmanxanaların tikintisi həm yeni iş yerləri yaradır və minlərlə şəxsi işlə təmin edir, həm turizm potensialını artırmaqla ölkə iqtisadiyyatına uzunmüddətli dövrdə müsbət təsir göstərir, həm də Azərbaycan mədəniyyətini, idmanını dünyaya tanıdır”.

Məlumat üçün qeyd edək ki, “Gənclər Debat Forumu: Olimpiya Kuboku” layihəsi çərçivəsində baş tutan təlimlər Bakı, Gəncə, Lənkəran və Şəki şəhərlərini əhatə edib və təlimlərdə 200 gənc iştirak edib.

Təlimlərdə debat metodologiyası vasitəsi ilə Avropa Oyunlarının keçirilməsinin ölkəmizə verdiyi faydalar haqqında fikir mübadiləsi aparılıb.

İlhamə