“Bakı-2015 I Avropa Oyunlarının həyəcanı daha çox hiss edirik”

ADNA-nın könüllü tələbələri: “Çünki bu tədbirin əsas hissəsi bizik”

“Avropa Oyunlarına çox az qaldı, cəmi 1 gün... Həyəcanımız getdikcə çoxalır. Çünki Avropa Oyunları ilk dəfə olaraq məhz odlar yurdumuz Azərbaycanda keçirilir. Bakımız bu möhtəşəm tədbirə ev sahibliyi edir. Bakı 2015 I Avropa Oyunları addım-addım yaxınlaşdıqca, odlar yurdumuzun hərarətini daha da artırır. İçimizdəki coşğunu isə söz ilə ifadə etmək mümkün deyil. Bu tədbirin əsas hissəsi də bizik - Könüllülər... “Baku - 2015 ailəsi”nin bir parçası olmaq həqiqətən inamılmaz bir duyğudur”.

Azərbaycan Dövlət Neft Akademiyasının bir qrup tələbəsi facebbok sosial şəbəkəsində yaxınlaşmaqda olan beynəlxalq tədbirlə bağlı öz hisslərini ifadə ediblər. Qeyd edək ki, bu tədbirdə ADNA-nın 1500-dən çox könüllüsü iştirak edir.

ADNA könüllüləri yazır: “Könüllü kimi iştirak etmək üçün qeydiyyatdan keçdiyimiz gündən indiyədək mərhələ-mərhələ müəyyən prosesləri keçdikcə həyəcanımız daha da artır. Məsuliyyətimizi daha yaxşı dərk edirik. Müxtəlif tədbirlərdə iştirak edir, görəcəyimiz işlərlə bağlı təlimlərdə təlimatlandırılırıq. Çox mehriban kollektivimiz formalaşıb. Kollektimiz daxilində həm xarici, həm də yerli mütəxəssislər var. Ayrı-ayrı vəzifələrdə xidmət göstərsək də məqsədimiz birdir - ölkəmizi dünya arenasında ən yüksək səviyyədə təmsil etmək. Hər birimiz iş qrafikləri, tutduğumuz vəzifələrlə artıq tanış olmuşuq. Bizə verilən işdən, vəzifədən asılı olmayaraq, hər birimiz tapşırıqları layiqincə yerinə yetirməliyik. Öz bacarığımızı, iş qabiliyyətimizi tam şəkildə təqdim etməliyik. Biz könüllülər - Neft-mexanika fakültəsindən Məleykə Rzazadə, Rüstəm, Toğrul Kerimov, Ruslan ənvərli, İlkin Əhmədov, Ağasəid Kərimli, Firqət Feyzili, Qaz-neft mədən fakültəsindən Əli Babayev, Energetika fakültəsindən Emil Mirzeyev əlimizdən gələni əsirgəməyəcəyik. Biz dünyaya nümayiş etdirməliyik ki, Azərbaycan, Bakı bu missiyanı – İlk Avropa Oyunlarını keçirməyi layiqincə yerinə yetirdi. Öz birliyimizi, gücümüzü, təkrarolunmazlığımızı, qonaqpərvərliyimizi, dəyərlərimizi yüksək şəkildə göstərməliyik. Biz bunu bacaracağıq. Hamımıza bu şərəfli missiyada uğurlar!”

NİGAR