“Çingiz Abdullayevə çatdırın, məndən kitab yazsın” – Məhkəmədə dəhşətli dələduzluq faktları

Bu gün Bakı Ağır Cinayətlər Məhkəməsində dələduzluqda təqsirləndirilənlər - 1978-ci il təvəllüdlü Alim İbrahimov və keçmiş məhkum, 1987-ci il təvəllüdlü Tərlan Comərdovun cinayət işi üzrə məhkəmə keçirilib.

Teleqraf.com xəbər verir ki, hakim Rahib Salmanovun sədrlik etdiyi prosesdə zərərçəkmiş Adil Həsənov ifadə verib.

O, bildirib ki, Bakıda fərdi yaşayış evi və bina tikintisi ilə məşğul olub: “Tərlanla dostum vasitəsi ilə tanış oldum. Ümumilikdə 123 min manat zərər çəkmişəm. Ev tikərkən vergi ödənişləri ilə bağlı problemlərim yarandı. Problemi həll etmək üçün tanış axtardım. Şəriklərimizdən biri Tərlanı tapdı və bu işi həll edəcəyini dedi. Təlanla görüşdük, əvvəlcə şirinlik istədilər. Biz də razılaşdıq”.

Zərərçəkmiş qeyd edib ki, təqsirləndirilənlərdən Tərlan Comərdov Alim İbrahimovu ona vergilər nazirinin 1-ci müavini Natiq Əmirovun müşaviri kimi təqdim edib: “Bildirdi ki, vergi ilə bağlı problemlərini Alim İbrahimov həll edəcək. Tərlan Comarədov Alim İbrahimova “müəllim” deyə müraciət edirdi. Tərlan deyirdi ki, işi müəllim həll edəcək. Nazirliyin vəzifəli şəxsləri ilə əlaqəsinin olduğunu, məsələni həll edəcəyi vədini verdi. Ona 123 min manat pul vermişəm”.

Adil Həsənov qeyd edib ki, Alim İbrahimovla görüşmək üçün Vergilər Nazirliyinə gedib: “Orada öyrəndim ki, nazirlikdə bu adda şəxs yoxdur. Bir neçə dəqiqə sonra Alim İbrahimov mənə zəng etdi, bildirdi ki, nazirliyin qarşısında məni gözləyir. Çıxanda BMV markalı avtomobildə gördüm. Ondan pulumu istədim. Dedim, ya da aktı ver.

O, bildirdi ki, aramızda olan adama etibarın yoxdur? Bu sözdən sonra onunla razılaşdım”.

Zərərçəkmiş Alim İbrahimovun sürücüsünün də olduğunu deyib.

Təqsirləndirilən Alim İbrahimov zərərçəkmişin yalan danışdığını bildirib: “Mən kiməm ki, sürücüm olsun? Həm də mən ondan pul almamışam. Tərlanın da ondan pul almasından xəbərim yoxdur. İşi danışmışdıq, sonra alınmadı. İmkan olsa mənim xahişimi yazıçı Çingiz Abdullayevə çatdırın. Çingiz Abdullayev mənim məhkəməmdən bir kitab yazsın”.

Digər zərərçəkmiş Fikrət İbrahimov da ifadə verib. O, bildirib ki, qardaşı ilə şərikli qapı-pəncərə sexi işlədiblər: “Bundan əlavə digər tikinti materiallarının da satışı ilə məşğul olmuşuq. Yaxın dostum Bəhruzla tez-tez görüşürdük. Görüşlərdən birinə gələndə süfrə arxasında Alimin də olduğunu gördüm. Əvvəlcə özünü dindar adam kimi təqdim etdi. Dindən geniş məlumatı var idi. Səliqəli də geyinirdi.

Nə təsadüf idisə, görüşlərdə Alim çox vaxt söhbətimizin üstünə gəlirdi. Sonradan özünü vəzifəli şəxsin mühafizə rəisi kimi təqdim elədi”.

Zərərçəkmiş qeyd edib ki, bir müddət keçəndən sonra Alim İbrahimovun vasitəsi ilə həmin vəzifəli şəxsin tikinti şirkətlərinə lazım olan qapı-pəncərələrin onlardan alınmasında kömək etməsini düşünüb: “Bu barədə Alim İbrahimovla danışdıq, onunla da razılaşdıq”.

Fikrət İbrahimov bildirib ki, Alim İbrahimovun ona 28 min manat borcu qalıb: “Mən Alimə başqa tikinti materialları da satdığımızı dedim. Bir gün zəng elədi ki, 120 ton armatur lazımdır. Mən də hər tonunda 20 manat xeyir tutaraq ona verəcəyimi dedim. Alim dedi ki, pulu nağd şəkildə ödəyəcək.

Səhəri gün Alim maşınları sexə göndərdi. Malı yükləyəndən sonra dedi ki, pul yoxdur. Mənə zəng edəndə dedim ki, pul yoxdusa, boşaldın. 15 dəqiqə sonra Alim zəng elədi. Başladı ki, bəs görün necə böyük adamla iş görmək istəyirsən, amma 120 ton armaturun söhbətini edirsən. Malın qiyməti də 94 min edirdi.

Alim 94 minin söhbətini etməməyimi, pulu 1-2 günə verəcəyini söylədi. Sonra yoxa çıxdı. Dostum Bəhruza dedim, bir neçə gün sonra Alimi tapdıq. Pulun bir hissəsini qaytardı. 28 min borclu qaldı”.

Fikrət İbrahimov zərərçəkmişin ifadəsinə belə münasibət bildirib: “Fikrət müəllim nə deyirsə, düz deyir. Dediklərinin hamısı doğrudur. Məqsədim malı sataraq pul qazanmaq idi. Ancaq mənə də dostum atıb. Malı Məşəddə tanış olduğum Elçin Həmidova vermişəm. Mən də tonunda 20 manat qazanc əldə edəcəkdim. Ancaq Elçin pulun qalanını vermədi. Mən də onu məhkəməyə vermişəm. Məhkəmə qərar çıxarıb ki, Elçin mənə dəymiş ziyanı ödəsin. Ancaq qərar icra olunmur. Mən çalışırdım ki, pulu qaytarım. Ancaq həbs edildiyim üçün imkan olmadı”.

Proses noyabrın 10-da davam edəcək.

İttihama görə, Tərlan Comərdov və Alim İbrahimov Cinayət Məcəlləsinin 178.3.2-ci (dələduzluq, külli miqdarda) maddəsi ilə ittiham olunub.

Tərlan Comərdov Sumqayıt sakinlərindən pul alıb qaytarmadığı üçün bu ilin avqust ayında 9 il müddətinə azadlıqdan məhrum edilib.

Zərərçəkmişlərdən biri Feyzulla Qasımov Baku Medical Plazada baş həkimin müavinidir. O, ifadəsində bildirib ki, özünü vəzifəli şəxs kimi təqdim edən Alim İbrahimov dostunun qızıl dükanından 16 min 800 manat dəyərində zinət əşyası götürüb və pulunu ödəməyib.

Cinayət işində 10-dan çox zərərçəkmiş var.

Hacı Zeynalov