"190 mini yuxarı verdik, o qədər də özümüzə qaldı" – MN-dəki yeyinti haqda yeni faktlar

Müdafiə Nazirliyinin mənimsəməyə görə tutulmuş Maliyyə və Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin Maliyyə Xidmətinin sabiq rəisi, polkovnik Cəlal Kazımov, Quru Qoşunların Maliyyə İdarəsinin rəisi Bayram Bayramov və Hərbi Dəniz Qüvvəllərinin Maliyyə Xidmətinin sabiq rəisi Vüsal Əlizadənin cinayət işi üzrə məhkəmə prosesi keçirilib.

Teleqraf.com xəbər verir ki, fevralın 16-da Bakı Hərbi Məhkəməsində hakim Fikrət Əliyevin sədrliyi ilə keçirilən prosesdə şahid qismində Nazim Süleymanov ifadə verib.

O bildirib ki, Hərbi Hava Qüvvəllərinin hərbi hissəsində maliyyə xidmətinin rəisi, daha sonra isə Müdafiə Nazirliyinin Maliyyə və Büdcə İdarəsinin təftiş şöbəsində baş təftişçi olub. Onun bildirdiyinə görə, iki hərbi hissədə yoxlamada iştirak edib.

Nazim Süleymanov qeyd edib ki, alver etdikləri şəxslərlə istintaq zamanı üzləşdiriliblər.

Prokuror Fuad Musayev şahidə “mən sizin dediyiniz kimi alver ifadəsini işlətmək istəmirəm, sövdələşdiyiniz şəxslərlə üzləşmənizə səbəb nə olub” sualına şahid belə cavab verib: “Bəzi məbləğlər təsdiq edilmirdi. Buna görə də üzləşmə həyata keçirildi”.

Nazim Süıeymanov bildirib ki, maliyyə rəisi işlədiyi hərbi hissələrdən birində 3 dəfə təftiş aparılıb, 1 milyon 400 min manat əlavə vəsait müəyyən edilib: “Yoxlamaların sonunda təftişçi payını götürərək gedirdi. Mənim təftiş şöbəsinin rəisi Rafael Xələfovla əlaqəm olub. Maliyyə xidməti ilə bağlı onunla bəzi müzakirələr aparmışıq. 1 milyon manat civarında silinmiş vəsaitin 30-35 faizi mənə çatıb. Qalan pulu isə maliyyəçilər və təftişçilər götürüb”.

Nazim Süleymanov qeyd edib ki, ümumilikdə onun tərəfindən dövlətə 420 min manat ziyan vurulub. Həmin vəsaiti tam olaraq dövlət büdcəsinə ödəyib, hazırda təqaüdə çıxıb.

Vəkillərin suallarını cavablandıran Nazim Süleymanov bildirib ki, hərbi dəniz hava qüvvələrinin hərbi hissəsində maliyyəçi işləyən zaman Maliyyə və Büdcə İdarəsinin rəisi Namiq Poladov olub: “Namiq Poladovun dövründə də hərbi hissələrdə belə qaydada işlənilib. Təftişə gələn təftişçi sonda pul aparıb. Həmişə eyni qaydada iş görülüb. O vaxtda elə olub, sonra da eyni qayda ilə işləmişik”.

Nazim Süleymanov bildirib ki, 2020-ci ilin dekabrında təftiş şöbəsində baş təftişçi işinə başlayıb.

Şahid Dövlət Təhlükəsizliyi Xidmətində Rafael Xələfovla üzləşməsindən danışıb: “Bu üzləşmə bəzi maliyyə rəqəmləri ilə bağlı idi. Biz 4-cü korpusda yoxlamaya getmişdik. 1 milyon 80 min manat vəsaitin silinməsi ilə bağlı məsələni Rafael Xələfov qəbul etmirdi. Biz üzləşdik, həmin zaman yadına düşdü və qəbul etdi. 1 milyon 80 min manatın ona çatdığını təsdiqlədi”.

Nizami Məmmədovun vəkili Rəşad Mirmehdizadə bundan əvvəlki proseslərdə Rafael Xələfovun Nazim Süleymanovla birlikdə yoxlamaya getmələri barədə verdiyi ifadəsini xatırladıb. Vəkilin səsləndirdiyi həmin ifadədən məlum olur ki, Rafael Xələfov Nazim Süleymanovla birlikdə korpusda apardığı yoxlama zamanı 380 min manat alıblar, 190 min yuxarı veriblər, 190 min manatı isə özü ilə Nazim Süleymanov arasında bölüşdürüblər.

Nazim Süleymanov Rafael Xələfovun bu ifadəsinin həqiqət olmadığını söyləyib: “Rafael Xələfov mənə pul verməyib. Əksinə, mən ona pul vermişəm”.

Daha sonra ifadə verən Emin Hüseynov bildirib ki, 3 hərbi hissədə maliyyə xidmətinin rəisi işləyib. Onun sözlərinə görə, işlədiyi hərbi hissədə əlavə vəsaitin 65 faizini Cəlal Kazımova verib. Şahid deyib ki, onun tərəfindən dövlətə dəymiş ziyan 350 min manat olması müəyyən edilib, həmin vəsaitdən cəmi 17 min manat ödəyib. O, yaxın vaxtlarda qalan pulları da ödəyəcəyinə söz verib.

Şahid qismində dindirilən Cəmil Quliyev 5 hərbi hissədə maliyyə xidmətinin rəisi olub. Onun sözlərinə görə, hərbi hissələrdən birində 1 milyon manat əlavə vəsait silinib. Həmin vəsaitində 60 faizini korpusun maliyyə xidmətinin rəisi olmuş – Yaşar Rzayev və Nazim Süleymanova verib.

Daha sonra ifadə verən Eduard Hacıyev deyib ki, 519 min 810 manat ziyan müəyyən edilib. Onun sözlərinə görə, həmin puldan Cəlal Kazımova da verib: “Çünki rəisim Cəlal Kaızmov idi. Bundan əlavə xüsusi tapşırıqlar olub. Bu vəsaitləri də Cəlal Kazımova vermişəm. Məndən nə istəyirdi, verirdim. Amma xüsusi tapşırıqlarla bağlı vəsait kimə çatdığını bilməmişəm”.

Eduard Hacıyev qeyd edib ki, onun tərəfindən dövlətə 151 min manat ziyanın vurulması müyyən edilib və həmin vəsaiti tam olaraq dövlət büdcəsinə ödəyib.

Şahidin ifadəsi ilə bağlı arayış verən Cəlal Kazımov bildirib ki, heç bir xüsusi tapşırıqla bağlı pul almayıb: “Mənə bu şəxs heç bir vaxt pul verməyib. Namiq Poladov, Nərman Cabbarov yoxlama aparıblar. İndi ad çəkmək istəmirlər. Belə ifadələri burada səsləndirirlər”.

Məhkəmədə ifadə verən maliyyə xidmətinin rəisləri deyiblər ki, əsgərlərin, şəxsi heyətə aid vəsaitlər tam qaydasında paylanılıb, həmin vəsaitlərin mənimsəməyiblər.

“Mən 2006-cı ildən xidmətdə olmuşam. 2017-ci ildən isə Maliyyə xidmətinin rəisi vəzifəsini daşımışam. Əsgərin pulunu mənimsəmək ən pis işdir. Əsgərin puluna göz dikmək olmaz. Heç vaxt əsgərin pulunu mənimsəməmişəm” – deyə hərbi hissələrdən birinin maliyyə xidmətinin rəisi olmuş Ceyhun Məmmədov bildirib.

Nizami Məmmədovun vəkili Rəşad Mirmehdizədə bildirib ki, cəmiyyətdə belə bir fikir formalaşıb ki, əsgərlərin pulları mənimsənilib: “Amma araşdırlar zamanı belə bir fakt aşkarlanmayıb”.

Şahid qismində ifadə verən maliyyə xidmətinin rəisləri də deyiblər ki, əsgərlərin əməkhaqlarından bir manat da olsun mənimsənilməyib, onların vəsaitləri özlərinə tam ödənilib.

Prosesdə şahid qismində çıxış edən maliyyə xidmətinin rəisləri qeyd ediblər ki, onlar tərəfindən mənimsənilən vəsaitlərin bir qismi ödənilib. Hər bir maliyyə işçisi ifadələrində dövlətə vurmuş olduqları ziyanı yaxın zamanlarda tam ödəyəcəklərinə söz veriblər.

Növbəti proses fevralın 23-də davam edəcək.

Qeyd edək ki, Müdafiə Nazirliyinin Maliyyə və Büdcə İdarəsinin sabiq rəisi general-mayor Nizami Məmmədov, Hərbi Hava Qüvvələrinin (HHQ) Maliyyə Xidmətinin sabiq rəisi, polkovnik Cəlal Kazımov, Quru Qoşunların maliyyə idarəsinin rəisi Bayram Bayramov, Hərbi Hava Qüvvəllərinin maliyyə xidmətinin sabiq rəisi Vüsal Əlizadə, Müdafiə Nazirlinin Satınalmalar və Təchizat İdarəsinin sabiq rəisi, polkovnik Mahir Şirvanov, həmçinin nazirliyin Satınalmalar və Təchizat İdarəsinin sabiq rəisi Məlikməmməd Qurbanov, nazirliyin mənzil istismar idarəsinin sabiq rəisi, polkovnik Fikrət Mirzəyev Dövlət Təhlükəsizliyi Xidmətinin keçirdiyi xüsusi əməliyyat nəticəsində həbs ediliblər.

Təqsirləndirilən şəxslər dövlət büdcəsindən ayrılan pulları mənimsəməkdə ittiham edilirlər.

Xatırladaq ki, cinayət işi üzrə ümumilikdə dövlətə dəymiş ziyan 143 milyon manatdır.

Cinayət işləri ayrı-ayrı icraatlarda baxılması üçün məhkəməyə göndərilib. İstintaq dövründə dövlətə vurulmuş ümumi ziyanın 40 milyon manatı ödənilib.

Cinayət işi üzrə Maliyyə Nazirliyi zərərçəkmiş qismində tanınıb. Təqsirləndirilən şəxslərin hər biri Cinayət Məcəlləsinin 179.4-cü (xüsusi ilə külli miqdarda ziyan vurmaqla mənimsəmə törətmək) maddəsi ilə ittiham irəli sürülüb.