Facebook şərhinə görə şagirdi öldürənlərin şikayəti təmin edilmədi

Bakı Apelyasiya Məhkəməsində 11-ci sinif şagirdini öldürməkdə təqsirli bilinən Elsevər Məmmədov, Nurlan Dünyamalıyev, Samir Məmmədov, Fuad Heydərov və Abbas Abbaslının apelyasiya şikayəti üzrə məhkəmə prosesi başa şatıb.

Teleqraf.com xəbər verir ki, 2014-cü ilin aprelin 2-də Binəqədi şosesi, döngə 4 ünvanında yerləşən “Davud market”in qarşısında 1997-ci il təvəllüdlü Mobil Abdullayev bıçaqlanıb. 11-ci sinif şagirdi olan Mobil Abdullayevi xəstəxanaya yerləşdirsələr də, onun həyatını xilas etmək mümkün olmayıb.

Hadisənin münaqişə zəminində Tovuz rayon sakini Elsevər Məmmədov tərəfindən törədildiyi müəyyən edilib və o, həbs olunub. İstintaq araşdırması zamanı cinayətin digər iştirakçıları - Bakı şəhər sakinləri, 1997-ci il təvəllüdlü Nurlan Dünyamalıyev və 1996-cı il təvəllüdlü Samir Məmmədov müəyyən edilib. Onlar da saxlanılıblar. İstintaq qanlı cinayətin bəzi təfərrüatlarını üzə çıxarıb.

Öldürülən Mobil Abdullayev penitensiar xidmətin formasını geyinərək şəkil çəkdirib. O, həmin şəkli Facebook səhifəsində yerləşdirərək “Privet, voram” sözünü yazıb. Şəklin altına Elsevər Məmmədov şərh yazıb. Onun şərhi mübahisəyə səbəb olub. Həmin vaxt Mobil Abdullayev oğru aləminin nümayəndələrinin ünvanına söyüş söyüb.

Bu söyüşdən sonra tərəflər arasında mübahisə daha da qızışıb. Həmin vaxt Mobil Abdullayev ana-bacı söyüşü söyüb. Qarşı tərəf isə mübahisəni sosial şəbəkədə yox, real həyatda davam etdirməyi tələb edib. Bu zaman Mobil Abdullayev “Davud” marketin qarşısında görüş təyin edib. Elsevər Abdullayev tanışları Fuad Heydərov, Abbas Abbaslı, Nurlan Dünyamalıyevlə sosial şəbəkədə oğru aləmi ilə bağlı yaranan mübahisəni aydınlaşdırmaq üçün görüş yerinə gəliblər. Mobil Abdullayev də hadisə yerinə tək gəlməyib. O, yaxın bir neçə qohumunu götürərək, həmin yerə gəlib. Görüş zamanı tərəflərin mübahisəsi qanlı cinayətlə nəticələnib.

Təqsirləndirilən şəxslər Cinayət Məcəlləsinin 120.1-ci (qəsdən adam öldürmə) və 221-ci (xuliqanlıq) maddəsi ilə ittiham olunublar. Bakı Ağır Cinayətlər Məhkəməsinin hökmü ilə Samir Məmmədov 14 il, Elsevər Məmmədov 3 il, Nurlan Dünyamalıyev 8 ay müddətinə azadlıqdan məhrum edilib. Digər təqsirləndirilənlər Fuad Heydərov və Abbas Abbaslı şərti cəza alıblar.

Hökmdən təqsirləndirilən şəxslər narazı qalıblar. Onlar apelyasiya şikayəti verərək cəzalarının yüngülləşdirilməsini istəyiblər. Həmçinin prokurorluq da apelyasiya şikayəti verərək təqsirləndirilən şəxslərin cəzalarının ağırlaşdırılmasını tələb ediblər.

Qeyd edək ki, Bakı Apelyasiya Məhkəməsində, hakim Əmir Bayramovun sədrliyi ilə keçirilən prosesdə təqsirləndirilən şəxslərin apelyasiya şikayətinə məhkəmə istintaqı aparılmadan baxılması barədə qərar qəbul edib. Həmin qərardan müdafiə tərəfi Ali Məhkəməyə kasasiya şikayəti verərək, ilkin baxış iclasının qərarının ləğv edilməsini istəyib. Ali Məhkəmədə məlum qərarı ləğv edib və şikayəti yenidən ilkin baxışa qaytarıb.

Bu dəfə apelyasiya şikayəti hakim Mirzəli Abbasovun sədrlik etdiyi kollegiyada araşdırılıb. Məhkəmə istintaqı ilə araşdırılan apelyasiya şikayəti üzrə sonda qərar elan edilib. Qərara görə, həm təqsirləndirilən şəxslərin apelyasiya şikayəti, həm də prokurorluğun protesti təmin edilməyib.

Hacı Zeynalov