“Deyirdilər, oğlumu əfvlə çıxaracaqlar” – Mirşahinin qardaşı

Dələduzluqda təqsirləndirilən fəaliyyəti dayandırılmış ANS Şirkətlər Qrupunun vitse-prezidenti, tanınmış jurnalist Mirşahin Ağayevin qardaşı Mirəddin Ağayevin cinayət işi üzrə məhkəmə prosesi keçirilib.

Teleqraf.com xəbər verir ki, bu gün Bakı Ağır Cinayətlər Məhkəməsində hakim Novruz Kərimovun sədrliyi ilə keçirilən prosesdə zərərçəkmiş Gözəlxanım Səmədova ifadə verib.

Zərərçəkmiş bildirib ki, iki övlad sahibidir, onlardan biri hazırda həbsxanada cəza çəkir: “Oğlum 4 ildən artıqdır ki, həbsxanadadır, ağır xəstədir. Onun həbsdən çıxarılmasını istəyirdim. Bunun üçün də əlimdən gələni edirdim. Adil adlı tanışımın vasitəsi ilə Mirəddini tanıdım. Oğlumun həbsdən azad edilməsi üçün 20 min manat istədilər. İstənilən məbləği taparaq ona verdim. Deyirdilər ki, oğlumu əfvlə çıxaracaqlar”.

Digər zərərçəkmişlər - Zaur Abbasov və Gülər Əhmədli də ifadə veriblər. Onlar dəymiş ziyanın təqsirləndirilən şəxs tərəfindən ödənildiyini, ondan şikayətçi olmadıqlarını deyiblər.

Növbəti proses yanvarın 18-də davam edəcək.

İttihama görə, Bakı şəhər sakini Qəzənfər Qəzənfərovun Səbail rayon Polis İdarəsinə şikayəti əsasında Mirəddin Ağayev istintaqa cəlb olunub. Şikayətçi Mirəddin Ağayevin dələduzluq yolu ilə onun 2000 manatını mənimsədiyini bildirib.

Təqdim olunan sübutlar əsasında cinayət içi açılıb və bir neçə gün sonra Mirəddin Ağayev yaşadığı Yardımlı rayonunda saxlanılıb. May ayının əvvəllərində isə məhkəmə onun barəsində həbs qərarı çıxarıb.

Mirəddin Ağayev 4 vətəndaşa qarşı ümumilikdə 86 min manat məbləğində dələduzluq edib.

Xatırladaq ki, ixtisasca həkim olan Mirəddin Ağayev Mirşahin Ağayevin böyük qardaşıdır.