Taliban Moskva danışıqlarında iştirak edəcək

"Taliban" radikal hərəkatının nümayəndələri Rusiya tərəfindən Əfqanıstanla bağlı təşkil olunan danışıqlarda iştirak etməyə raşılıq verib.

Publika.az "RİA-Novosti" agentliyinə istinadən xəbər verir ki, bunu hərəkat liderlərindən biri bildirib.

Qeyd edək ki, danışıqlar sentyabrın 4-də Rusiya paytaxtında keçirilməlidir.

Bundan əvvəl Rusiya XİN ikinci Asiya departamentinin direktoru Zamir Kabulov bildirmişdi ki, görüşdə Əfqanıstan, Rusiya və region ölkələrinin nümayəndələri iştirak edəcəklər. Məsləhətləşmələrin sonuncu raundu ötən ilin aprelində keçirilmişdi. Bu vaxta qədər taliblər məsləhətləşmələrdə iştirak etməyiblər, lakin bu dəfə Rusiya onların nümayəndələrini dəvət etməyi qərara alıb.

Xatırladaq ki, avqustun 19-da Əfqanıstan Prezidenti Əşrəf Qəni “Taliban” hərəkatı ilə üç ay müddətinə müvəqqəti atəşkəs elan edib. Prezidentin sözlərinə görə, atəşkəs yalnız taliblər buna qarşılıqlı cavab verəcəyi təqdirdə tətbiq olunacaq. “Taliban” hərəkatının lideri Heybətulla Axundzadə isə hökumətin atəşkəs barədə təklifini rədd edib. O bildirib ki, “Taliban” atəşkəslə razılaşmır və hökumətlə mübarizəni davam etdirmək niyyətindədir.