"Gizli axşam yeməyi"nin sirri açıldı

İtaliyalı tədqiqatçı Sabrina Sfortsa Qalitsiya rəssam Leonardo Da Vinçinin "Gizli axşam yeməyi" adlı əsərinin gizli mənasını açmağa müvəffəq olduğunu bildirib.

Məlumata görə, göstərilən "Da Vinçi kodu"nun Den Braunun məşhur romanı ilə qətiyyən əlaqəsi yoxdur.

Vatikan tarixi üzrə ixtisaslaşan Sabrina Sfortsa Qalitsiyanın fikrincə, Leonardo "Gizli axşam yeməyi" rəsmində dünyanın sonu barədə mesaj verib.

Mütəxəssis riyazi-astroloji şifrələrə, kətan üzərində çəkilmiş əsərin rəmzliyinə – günün 24 saatını təqdim etmək üçün istifadə olunan Latın əlifbasının 24 hərfinə, həmçinin müəllifin 3 rəqəminə – 3 pəncərə, 3 apostol qrupu və sairə eyham vurmasına diqqət yetirdikdən sonra bu qərara gəlib.

Alim araşdırma nəticəsində dünyanın sonunu bildirən tarixi müəyyən edib – 21 mart 4006-cı il. Həmin gün qiyamət qopacaq və noyabrın 1-nə qədər davam edəcək.

Öncəgörməyə əsasən, bəşəriyyət həmin dövr ərzində məhv olacaq./Report/