Azərbaycanlı qapıçı və həyat yoldaşı saxlanıldı – Şok səbəb

Güney Azərbaycanın “Traktor” (Təbriz) futbol klubunun qapıçısı Möhsün Fruzan və həyat yoldaşı saxlanılıb.

Teleqraf.com xəbər verir ki, bu barədə Təbrizin İran parlamentindəki deputatı Əhmədrza Əlirzabeygi məlumat verib.

O, cütlüyün “Traktor” və “Sepidrud” komandaları arasında keçirilmiş oyun barədə mərcə girməsinə görə saxlanıldığını bildirib:

“Məhkəmə futbolla bağlı qumar şəbəkəsi və Fruzanın iştirak etdiyi mərcləşməyə qatılanları təqib edir. “Traktor”-“Sepidrud” oyununda baş verən hadisənin üstü açılıb, ona görə də oyunun nəticəsinin dəyişməsi məqsədəuyğun olardı”.

Aprelin 12-də İran çempionatının növbəti oyunları çərçivəsində Rəştdə “Traktor”la “Sepidrud” arasında görüş baş tutub. Oyun zamanı “Traktor”un qapıçısı Möhsün Fruzanın şübhəli hərəkətləri tamaşaçıların və komanda rəhbərliyinin etirazı ilə qarşılanıb.

Bundan sonra qapıçının oyunun nəticəsi ilə bağlı əvvəlcədən mərcə girdiyi və bu yolla külli miqdarda pul qazandığı iddia edilib.

Möhsün Fruzan artıq “Traktor” klubundan uzaqlaşdırılıb.