Rusiyadan şok ittiham: “ABŞ Əfqanıstanda narkotik ticarəti ilə məşğuldur”

“Əfqanıstandakı Amerika kəşfiyyatı narkotik ticarəti ilə məşğuldur”.

Teleqraf.com xəbər verir ki, bunu Prezident Vladimir Putinin Əfqanıstandakı xüsusi nümayəndəsi Zamir Kabulov deyib.

Kabulov bu ittihamı ABŞ-ın Rusiya hərbi kəşfiyyatının Talibanla gizli əməkdaşlığına dair iddialarına cavab olaraq səsləndirib.

“Bizə qarşı ittiham irəli sürən ABŞ kəşfiyyatının agentləri Əfqanıstanda narkotik ticarəti ilə məşğuldur. Təyyarələri Qəndahar və Baqramdan yoxlanılmadan Almaniya, Rumıniya və ağıla gəlməyən digər ölkələrə uçur. Bu haqda bizə Kabuldan danışıblar, ən tənbəl insanlar belə bu haqda danışmağa hazırdır. Bu sirri artıq hər kəs bilir”, - rus diplomat qeyd edib.

Əlavə edək ki, ABŞ-da nəşr olunan “Nyu-York Tayms” qəzeti Rusiya hərbi kəşfiyyatını Taliban qruplaşması ilə əməkdaşlıqda ittiham edib. İddiaya görə, Rusiya hərbi kəşfiyyatı Əfqanıstandakı amerikalı hərbçiləri öldürmək üçün Talibana pul mükafatı vəd edib.