Avropa İttifaqı Rusiyaya qarşı sanksiyaların detallarını açıqladı

Rusiyaya qarşı sanksiyalar maliyyə, enerji, nəqliyyat, ixrac nəzarəti və viza siyasətlərinə qarşı tətbiq edilir.

Teleqraf.com xəbər verir ki, Avropa İttifaqı Rusiyanın Ukraynaya qarşı genişmiqyaslı təcavüzə başlaması ilə əlaqədar blokun razılaşdırdığı yeni sanksiyaların təfərrüatlarını açıqlayıb.

Bu barədə Avropa Komissiyasının sədri Ursula Fon der Leyen liderlərin görüşündən sonra keçirilən mətbuat konfransında bildirib.

Onun sözlərinə görə, liderlərin razılaşdırdığı sanksiyalar paketi Rusiya iqtisadiyyatı və Rusiya elitası üçün geniş nəticələrə səbəb olacaq.

İttifaq rəsmisi deyib ki, sanksiyalar maliyyə, enerji, nəqliyyat, ixrac nəzarəti və viza siyasətlərinə qarşı tətbiq edilir.

Maliyyə sanksiyaları Rusiyanın əsas kapital bazarlarına çıxışını bağlayacaq.

“Bu, Rusiya bank bazarının 70%-nə, eləcə də hərbi sektor da daxil olmaqla iri dövlət şirkətlərinə təsir edəcək və bu sanksiyalar Rusiyanın borclanma xərclərini artıracaq, inflyasiyanı sürətləndirəcək və sənayeni tədricən sarsıdacaq”, - o deyib.

Rusiya elitasına qarşı sanksiyalar onlara öz aktivlərini Avropada saxlamağa imkan verməyəcək. Onun sözlərinə görə, enerji sektoruna qarşı sanksiyalar Rusiyanın neft emalı avadanlığının yenilənməsini çətinləşdirəcək. Rusiya şirkətlərinə təyyarələrin, hissələrin və aviasiya avadanlıqlarının satışı tamamilə qadağandır.

“Rusiyanın hazırkı kommersiya hava donanmasının dörddə üçü ABŞ, Avropa İttifaqı və Kanadada istehsal olunan təyyarələrdir və buna görə də ondan çox asılıdır”, - deyə Ursula Fon der Leyen bildirib.

Avropa İttifaqı Rusiyanın yarımkeçiricilər və digər qabaqcıl texnologiyalar kimi modernləşmə və inkişaf üçün vacib olan ən son texnologiyalara çıxışını məhdudlaşdırır. Viza siyasətinə gəlincə, rus diplomatları və iş adamları Aİ-yə daxil olmaq üçün imtiyazlı imkanlarını itirəcəklər.

Avropa Komissiyasının sədri qeyd edib ki, bütün bu tədbirlər digər Qərb tərəfdaşları ilə əlaqələndirilərək tətbiq edilir: “Bizim gücümüz birliyimizdədir. Kreml bunu bilir və nifaq salmaq üçün əlindən gələni edib, lakin bunun tam əksinə nail olub. Biz indi həmişəkindən daha birik”.

“Putin Avropa İttifaqına dost ölkəni fəth etməyə və Avropada sərhədləri zorla dəyişməyə çalışır. O, uğur qazanmamalıdır və bacarmayacaq”, - Avropa Komissiyasının sədri bildirib.