Ukrayna bu ərazilərini itirdi – Hücuma keçən rus ordusundan ağır zərbə

Ukraynanın Donbas bölgəsi uğrunda qızğın döyüşlər davam edir. Ruslar Severodonetskin ətrafına daxil olublar və Limanda möhkəmləniblər.

Teleqraf.com xəbər verir ki, bu barədə Ukrayna Silahlı Qüvvələrinin Baş Qərargahı məlumat yayıb.

Rus qoşunlarının Liman şəhəri istiqamətində - Liman qəsəbəsində möhkəmləndiyi, Slavyanska növbəti hücum üçün yenidən qruplaşdığı bildirilib.

Məlumata görə, Rusiya qüvvələri Severodonetskdə şəhərin şimal-şərq və cənub-şərq ətrafında cəmləşib. Qoşun qruplarını gücləndirmək üçün Rusiya müəyyən ərazilərə döyüş sursatı və texnika göndərir.

Donetsk istiqamətində Rusiya bölmələri əsas diqqəti Lisiçansk və Severodonetsk rayonlarında Ukrayna qoşunlarını mühasirəyə almağa və əsas logistika yollarını bağlamaq üçün hücum əməliyyatlarına yönəldib.

Luqansk vilayət hərbi administrasiyasının rəhbəri Sergey Qayday da Severodonetskdəki vəziyyətlə bağlı məlumat verib:

“Ruslar Severodonetskin ətrafına daxil olublar, iki şəhər sakini öldürülüb, beş nəfər yaralanıb. Severodonetsk və Lisiçansk uğrunda şiddətli döyüşlər gedir”.