1 Oktyabr 11:23
1 404
12 Punto 14 Punto 16 Punto 18 Punto

Prezident Vladimir Putin Rusiyanın mövqeyini sabitləşdirmək və növbəti hücum üçün qüvvələrini bərpa etmək üçün vaxt qazanmaq məqsədilə Ukrayna ərazilərini ilhaq etməyə tələsdi.

Teleqraf.com xəbər verir ki, bu barədə ABŞ-ın Müharibə Araşdırmaları İnstitutunun (ISW) hesabatında deyilir.

“Ukraynanın dörd bölgəsinin ilhaqı o demək deyil ki, Putin daha kiçik bir məqsəd üçün Ukrayna dövlətini tamamilə məhv etmək barədə bəyan etdiyi hədəfindən vaz keçib. Əgər ilhaq münaqişəni yeni cəbhə xəttində sabitləşdirsə, Kreml öz qüvvələrini və işğalını bərpa edə bilər”, - hesabatda bildirilir.

Eyni zamanda, amerikalı analitiklərin fikrincə, Putinin sentyabrın 30-dakı çıxışında Ukraynanın əks-hücumunun davam edəcəyi təqdirdə Rusiyanın ona qarşı dərhal nüvə silahından istifadə etmək niyyətinin heç bir əlaməti görünməyib. Ekspertlərin iddiasına görə, Rusiya prezidenti heç bir “qırmızı xətt” müəyyən etməyib. Üstəlik, bu müharibə zamanı Ukrayna Silahlı Qüvvələri Rusiyanın sərhəd bölgələrindəki hərbi obyektlərə zərbələr endirməklə Kremlin əvvəllər elan etdiyi “xəttləri” dəfələrlə pozub.

Putin hazırkı cəbhə xəttində münaqişəni dondurmaq və qüvvələri səfərbərlik hesabına bərpa etmək istəyir.

Eyni zamanda ISW qeyd edir ki, Rusiyanın nüvə silahından nə vaxt istifadə edə biləcəyini proqnozlaşdırmaq mümkün deyil, çünki bu, Putinin şəxsi qərarı olacaq.

Kreml nüvə silahından istifadə təhdidləri əvəzinə, qış dövründə qismən səfərbərlik və enerji təzyiqi yolu ilə öz məqsədlərinə nail olmağa çalışacaq. Bununla belə, analitiklər vurğulayırlar ki, Putin cəbhəni sabitləşdirə bilməyəcək və hazırlığı olmayan hərbçilərlə münaqişəni dondura bilməyəcək. Amerikalı ekspertlər hesab edirlər ki, Putin Ukraynanı nüvə silahı ilə vurmağa cəhd etsə, bu, Ukraynanı və ya Qərbi təslim etməyə məcbur etməyəcək, əksinə, bu, “böyük macəra”nın başlanğıcı olacaq.

Analitiklərin fikrincə, Putinin taktiki nüvə silahından istifadə etmək üçün iki əsas variantı var: silahlı əks-hücum əməliyyatını iflic etmək üçün əsas yerüstü rabitə xətlərinə və komanda məntəqələrinə və yaxud təmas xətti yaxınlığında Ukrayna qüvvələrinin böyük konsentrasiyasına zərbələr endirmək. Bununla belə, bu, hədəflərin heç birinə qarşı həlledici olmayacaq.

“Putin ciddi nəticələr əldə etmək və Ukraynanın əks-hücum əməliyyatına başlamasının qarşısını almaq üçün Ukrayna ərazisində çoxsaylı taktiki nüvə silahı yerləşdirməli olacaq. Nüvə silahından istifadənin miqyası, çox güman ki, Qərbin müvafiq zərbə riskini gücləndirəcək, bu da öz növbəsində, Putinin potensial itkilərini artıracaq”, - hesabatda deyilir.

Bundan əlavə, NATO-nun nüvə silahından istifadə etməsinə cavab olaraq, Rusiyanın mövqelərinə adi zərbələrlə cavab verməsi ehtimalı da var.


Müəllif: Mənsur Rəğbətoğlu