Medvedev o ölkəni də öz adlarına çıxdı: “Lenin yaradıb”

Rusiya Təhlükəsizlik Şurası sədrinin müavini Dmitri Medvedev Finlandiyanın tarixindən ironik şəkildə danışıb.

Teleqraf.com xəbər verir ki, ölkə rəsmisi müasir Finlandiyanın qurucusu kimi Rusiyanı göstərib.

Medvedev X sosial şəbəkəsində fin dilində yazır:

“Birinci soruşur: “Pekka, biz ruslardan niyə qorxuruq?”

Həmsöhbəti cavab verir: “Onlar işğalçılar və barbarlardır. Maraqlıdır, müstəqil Finlandiyanı kim yaradıb?”

Pekka fikrini tamamlayır: “Matti, bir rus vardı, adı Lenin idi”.

Medvedev bundan əvvəl də X sosial şəbəkəsində Finlandiyanın NATO-ya üzvlüyü ilə bağlı “vəziyyətin absurdluğunu qeyd edən iki fin arasında söhbət”i əks etdirən lətifə paylaşmışdı.

Rusiya rəsmisinin iddiasına haqq qazandıran TASS yazır ki, 1809-cu ildən Suomi Finlandiya Böyük Hersoqluğu adıyla Rusiya İmperiyasının tərkibində olub:

“1917-ci il dekabrın 6-da Finlandiya parlamenti Finlandiyanı müstəqil dövlət elan etmək qərarına gəlib. RSFSR Xalq Komissarları Soveti həmin il dekabrın 31-də ölkənin müstəqilliyini tanıyıb. Müvafiq fərmanı Vladimir Lenin imzalayıb”.