Ukrayna tərəfdaşlarından 42 ədəd "F-16" qırıcısı alacaq

Danimarka və Niderland Ukrayna Silahlı Qüvvələrinin pilotları üçün təlimlər başa çatdıqdan və digər şərtlər yerinə yetirildikdən sonra F-16 döyüş təyyarələrini Ukraynaya təhvil verəcək.

Teleqraf.com xəbər verir ki, bu barədə Danimarka Müdafiə Nazirliyi məlumat yayıb.

“ABŞ və digər tərəfdaşlarla sıx əməkdaşlıq edərək biz F-16 təyyarələrini Ukrayna Hərbi Hava Qüvvələrinə təhvil verməyə razıyıq. Bunun üçün şərtlər uğurla seçiləcək, sınaqdan keçiriləcək və ukraynalı kadrlar öyrədiləcək, həmçinin lazımi icazələr, infrastruktur və logistika olacaq”, - bəyanatda deyilir.

Bundan əvvəl, Ukrayna Prezidenti Vladimir Zelenski Niderland ilə Kiyevə 42 ədəd F-16 qırıcı təyyarəsinin tədarükü ilə bağlı saziş imzalayıb.