Cəbhədə irəliləyiş: Ərazilər geri alındı

Hücum əməliyyatlarını davam etdirən Ukrayna qoşunları 4 istiqamətdə irəliləyib.

Teleqraf.com xəbər verir ki, bu barədə ABŞ-ın Müharibə Araşdırmaları İnstitutu (ISW) məlumat yayıb.

Ukrayna ordusunun Baxmutda, Avdiv-Donetsk xətti boyunca, Donetsk və Zaporoje vilayətlərinin qərbində irəlilədiyi bildirilir.

ISW son bir həftə ərzində Ukrayna qüvvələrinin Baxmut istiqamətində 2 kvadratkilometr ərazini azad etdiyini, Kliçivka və Andrivkada müsbət nəticələr əldə etdiyini vurğulayıb.

Həmçinin, müdafiə nazirinin müavini Anna Malyar deyib ki, Ukrayna son bir həftə ərzində Tavriya (Zaporoje) istiqamətində ümumilikdə 4.8 kvadratkilometr ərazini azad edib, eləcə də Robotindən cənub və Verbovoydan qərbdəki əraziləri geri alıb.

Eyni zamanda, ISW qeyd edir ki, Rusiya qoşunları Kupyan-Svatov-Kreminna xəttində, Baxmutda, Avdiv-Donetsk xəttində, Donetsk və Zaporoje ərazilərində hücum əməliyyatları keçirib.