İŞİD-ə İraqda böyük zərbə - 238 ölü

İraqın çevik əməliyyat qüvvələri son bir həftə ərzində müvəffəqiyyətli döyüşlərlə İŞİD-i bir neçə istiqamətdə geri çəkilməyə vadar edib.

Bağdad Əməliyyat Qüvvələrinin komandanı, general-leytenant Əbdüləmir əl-Şammari son həftə ərzində həyata keçirilən əməliyyatlar nəticəsində 238 terrorçunun öldürüldüyünü açıqlayıb.

Teleqraf.com-un məlumatına görə, Şammari bu gün təşkil etdiyi mətbuat konfransında İŞİD-ə qarşı geniş əməliyyatların davam etdiyini söyləyib.

Ordu komandanı əməliyyatlar zamanı partlayıcı maddə istehsalı edən bir emalatxananın ələ keçirildiyini, silah, sursat və döyüşçüləri daşıyan 18 nəqiliyyat vasitəsinin, terrorçulara aid 20 düşərgənin məhv edildiyini, bölgədə olan 49 evin partlayıcılardan təmizləndiyini söyləyib.

"İŞİD-in vəhşicəsinə hücumlarına bölgə xalqı boyun əymədi", - deyən Şammari, təhlükəsizlik gücləri, könüllü birliklər, tayfa mənsublarının qatıldığı əməliyyatlara ABŞ-ın liderlik etdiyi koalisiya qüvvələrinin də döyüş təyyarələri ilə dəstək verdiyini vurğulayıb.

Nail Cəlil