8 Sentyabr 2015 19:08
364

İranın Xoy şəhərinin rəhbəri Hüseyn Seyvani deyib ki, Qərbi Azərbaycan vilayətinin İslam İnqilabı Keşikçiləri Korpusu (Sepah) ilə PJAK qruplaşması arasında Razi sərhəd zonasında baş vermiş toqquşmada bu qrupun 2 üzvü öldürülüb və digər beşi isə yaralanıb.

Seyvaninin sözlərinə görə, bazar ertəsi axşam, Xoy şəhərinin Biləsuvar kəndi yaxınlığında baş vermiş bu silahlı toqquşma zamanı, Sepahın da 2 üzvü öldürülüb, iki nəfər isə yaralanıb.

Keçən həftələr ərzində, İran ordusu ilə PJAK qruplaşması arasında Kürdüstan və Qərbi Azərbaycan əyalətlərində baş verən döyüşlər nəticəsində hər iki tərəfdən onlarla insan öldürülüb.

O cümlədən də, keçən ay Kürdüstan əyalətinin Kamyaran şəhərində baş vermiş döyüş zaman 5 Bəsic üzvü həlak olub.

Deyilənə görə, PJAK-ın İran qoşunlarına hücum etməsinə səbəb, bu qruplaşmanın bir neçə üzvünün həbs və edamı, o cümlədən də Sirvan Nejavinin edam edilməsi olub.

Kürdüstan Azad Həyat Partiyası (PJAK) qruplaşması 2011-ci ildə İran ordusu ilə bir tərəfli atəşkəs elan etmişdi, lakin İnqilabın Keşikçiləri Korpusu bu atəşkəsi naməlum səbəblərdən rədd etmiş və PJAK qrupunun tamamilə İran ərazisindən çıxarılmasını tələb etmişdilər.

PJAK qrupu özünü Türkiyədə fəaliyyət göstərən PKK-nın (Kürdüstan Fəhlə Partiyası) İran qolu kimi təqdim edir.


Müəllif:
Загрузка...