Aeroport yolunda qəza: avtomobil külə döndü - Video/Yeniləndi

13:39

Bakıda dəhşətli yol-nəqliyyat hadisəsi baş verib.

Teleqraf.com xəbər verir ki, Heydər Əliyev Beynəlxalq Hava Limanına gedən yolda baş vermiş qəza zamanı "QAZ-3110" markalı avtomobil "Ford Tranzit" ilə toqquşub.

Hadisə zamanı "QAZ-3110" yanaraq, külə dönüb.

Bununla bağlı aktyor Elcan Rəsulov Feysbuk hesabında video paylaşıb. Aktyor qəzadan sonra yolda uzun tıxacın yarandığını bildirib.

Bakı Nəqliyyat Agentliyinin mətbuat xidmətinin rəhbəri Mais Ağayev məlumatı təsdiqləyib.

Onun sözlərinə görə, şəhər mərkəzindən hava limanı istiqamətində yolda (keçmiş "Komsomol dairə"sində) yol nəqliyyat hadisəsi baş verib: “Hazırda nəqliyyat vasitəsi yanır”.

Mais Ağayev qeyd edib ki, yol-nəqliyyat hadisəsi həmin istiqamətdə tıxaca səbəb olub.

***

Şəhər mərkəzindən hava limanı istiqamətindəki yolda baş vermiş qəzada 1 nəfər ölüb.

Bunu Teleqraf.com-a açıqlamasında Şəhər Təcili və Təxirəsalınmaz Tibbi Yardım Stansiyasının baş həkimi Rauf Nağıyev deyib. Onun sözlərinə görə, qəza zamanı iki nəfər yaralanıb:

“Yaralanan şəxslər qapalı kəllə-beyin travması diaqnozu ilə 3 saylı şəhər Klinik Xəstəxanasına yerləşdirilib. Hadisə yerində bizim briqadalara qəza nəticəsində bir nəfər öldüyü deyilsə də, əməkdaşlarımız həmin meyiti görməyib”.

Həmin görüntüləri təqdim edirik: