Səxavət Əlisoy müxalifətə meydan oxudu

Müsavat Partiyası daxilində qarşıdurma davam edir. Partiya başqanı Arif Hacılı Məclis sədrinin seçilməsi üzərində, Qubad İbadoğlu isə Azərbaycan Demokratiya və Rifah Hərəkatını gücləndirməklə məşğuldur.

Qubad İbadoğluna yaxın şəxslər bəyan edirlər ki, artıq tərəflərin eyni təşkilatda fəaliyyəti mümkünsüzdür. Çünki artıq hər iki tərəf qırmızı xətti keçib. Qubad İbadoğlunun digər yaxın şəxsi Hüseyn Məlik isə partiyasının rəhbərliyinə ironiya edərək təklif edib ki, Məclis sədri postuna İsa Qəmbəri seçsinlər. İbadoğlunun digər müavini Səxavət Əlisoy isə bildirib ki, çoxlu sayda partiya üzvü hərəkata qoşulmaq niyyətindədir.

Bütün bunlar göstərir ki, Müsavat Partiyası öz dövrünün ən pis mərhələsini yaşayır.

Səxavət Əlisoy hətta müxalifətdə olan siyasi liderlərə də sataşaraq onları xaç atası adlandırıb: “Halınızdan məmnunsunuzmu, cənab, xaç ataları? Müxalif düşərgənin bugünkü durumu sizi feyziyab edirmi, cənab, dünya miqyaslı siyasi liderlər- corc vaşinqtonlar, çerçillər, trümenlər, taleyranlar, stalinlər, leninlər, atatürklər, rəsulzadələr və daha nə bilim kimlər?

Sizlərin vətən, millət və dövlət sevginizin quru sözdən başqa bir şey olmadığını isbatlamağa lüzum varmı? Təkəbbürünüzün, böyüklük maniyasına yoluxmanızın müxalif düşərgəni necə tənəzzülə uğratdığının fərqindəsinizmi? Sizlər, müxalifətin güc olması yolunda maneə olduğunuzu dərk edirsinizmi?

Məhz sizlərin siyasi lider iqtidarında olmamanız müxalifət daxilində intriqalara, mənəviyyatsızlıqlara rəvac verdi. Və sizlərin sultan kimi formalaşmanızda sizə inananların, sizləri başa keçirənlərin çox böyük suçu var. Sizlər layiq olduğunuz yerə qayıtmalısınız. Bir vaxt sizlərə inananlarsa, yeni sultanlar axtarışına çıxmamalıdır. Kəsəsi, indiki siyasi durumda hər kəs “nə etməli” sualına özü cavab tapmalıdır".

S.Əlisoy əlavə edib ki, Müsavat Partiyasının tənəzzülünün səbəbləri haqda təhlili yazısını yaxın günlərdə mətbuata təqdim edəcək: “Bu yazımda tənəzzülün gerçək səbəbləri sizlərin müzakirəsinə təqdim olunacaq”.

CAVİDAN