Çətindir, ancaq çıxış yolumuz yoxdur - Qurban Qurbanov

“Qalib gəlmək istəyirdik. Bilirdik ki, “Kəpəz” müdafiədən oynayacaq. Qələbə münasibəti ilə futbolçularımı təbrik edirəm. Qalib gəlmək üçün çox çalışdılar”.

Teleqraf.com-un məlumatına görə, bu sözləri "Qarabağ"ın baş məşqçisi Qurban Qurbanov Topaz Premyer Liqanın 5-ci turunda "Kəpəz"ə 2:0 hesabı ilə qalib gəldikləri oyundan sonra deyib. Daha sonra o, jurnalistlərin suallarını cavablandırıb.

- Son vaxtlar İbrahim Sehiçin əvəzedici komandaya göndərilməsi ilə bağlı xəbərlər yayılıb. Bu məsələ doğrudur?

- Yox, İbrahim əsas komandamızdadır. Hər hansı bir fikir olanda bu barədə heç kimə məlumat vermirik.

- Üç yeni oyunçuya şans verdiniz. Onların oyunundan razı qaldınız?

- Onlardan razı qala bilmərəm. Öz formalarından uzaqdılar. Bir neçə oyun oynamalıdılar ki, daha yaxşı çıxış etsinlər. Şadam ki, Dani qol vurdu. Bu, ona inam verəcək. Formaya qayıtmaq üçün böyük təkan oldu. Ancaq hələ çox işləməlidir, uzun müddətdir futboldan uzaqdır. Dani keçmiş formasına qayıtmaq üçün 4-5 oyun 90 dəqiqə meydanda oynamalıdır. Ümumi duruma baxanda razıyam, ancaq tam razı olduğumu deyə bilmərəm.

- "Çelsi" səfərindən sonra belə oyunlara çıxmaq sizə çətinlik yaratmır ki?

- Əlbəttə, çətindir. Ancaq başqa çarəmiz yoxdur. Biz istəyərdik ki, Premyer Liqada Çempionlar Liqası oyunlarına hazırlaşaq. Ancaq bunu bacara bilmirik. Çünki Premyer Liqada rəqiblərmiz daha çox müdafiəyə otururlar. Çətindir, ancaq çıxış yolumuz yoxdur.

- Oyunlarınızı Tofiq Bəhramov adına Respublika stadionunda keçirməyinizə səbəb nədir?

- 19 yaşlılardan ibarət komandamız Çempionlar Liqasında “Azərsun Arena”da oynayacaq və buna görə də oyunumuzu bura saldıq. Əsas məqsədimiz meydanı qorumaq idi. Bundan başqa, bu gün Tofiq Bəhramov adına Respublika stadionunun durumu daha idealdır.

- Olimpiya stadionuna uyğunlaşmaq problem yaratmayacaq?

- İndidən bir şey deyə bilmərəm. Orda azarkeş dəstəyi daha çox olacaq. Amma futbolçunun meydançaya uyğunlaşma problemi ola bilər. Oyundan sonra daha dəqiq bir söz demək olar.

\Qol.az\