"Qarabağ"la Neftçi" üz -üzə

Futbol üzrə Azərbaycan Premyer Liqasında XV turun daha iki oyunu keçiriləcək.

Teleqraf.com-un məlumatına görə, günün ilk matçında "Qəbələ" doğma azarkeşlər önündə "Sumqayıt"la qarşılaşacaq.

Sənan Qurbanovun baç məşqçisi olduğu kollektiv çempionatda "gənclik şəhəri" təmsilçisinə qarşı keçirdiyi 26 matçın hamısında qol vurmağı bacarıb və ev oyunlarının heç birində məğlub olmayıb. "Sumqayıt" altı oyundur ki, "Qəbələ"ni məğlub edə bilmir. 26 oyunun 16-da "Qəbələ", 2-də isə qonaqlar qələbə qazanıb, 8 qarşılaşma heç-heçə yekunlaşıb. "Qəbələ" hazırda 17 xalla beşinci, "Sumqayıt" isə 15 xalla altıncıdır.

XV tura mərkəzi qarşılaşma ilə yekun vurulacaq. Son ölkə çempionu "Qarabağ" turnir cədvəlinin lideri "Neftçi" ilə 75-ci çempionat oyununda üz-üzə gələcək.

Bu vaxta qədər keçirilən 74 oyunun 27-də Ağdam təmsilçisi, 20-də isə flaqman meydanı qələbə ilə tərk edib. 27 qarşılaşmada isə qalib müəyyənləşməyib. "Neftçi" hazırda 33 xalla birinci, "Qarabağ" isə 30 xalla ikinci sıradadır.

Qeyd edək ki, turun digər matçlarında "Sabah" səfərdə "Zirə"ni 2:0, "Səbail" isə "Keşlə"ni 3:0 hesabı ilə məğlub edib.

Azərbaycan Premyer Liqası, XV tur

3 fevral

14:00. “Qəbələ” – “Sumqayıt”

Hakimlər: Əliyar Ağayev, Akif Əmirəli, Rza Məmmədov, Kamal Umudlu

Hakim-inspektor: Munis Abdullayev

AFFA nümayəndəsi: Şaiq Həmidov

Qəbələ şəhər stadionu

18:30. “Qarabağ” – “Neftçi”

Hakimlər: Rəvan Həmzəzadə, Knyaz Əmiraslanov, Vüqar Bayramov, Səbuhi Bayramov

Hakim-inspektor: Vüsal Əliyev

AFFA nümayəndəsi: Rüfət Əmirov

Tofiq Bəhramov adına Respublika Stadionu

Qeyd edək ki, ötən gün Futbol üzrə Azərbaycan Premyer Liqasında 2018-2019 mövsümünün ikinci yarısına start verilib.