Alo, icra hakimiyyəti

Binəqədi sakinləri su-kanalizasiya problemindən şikayətçidir

Əhalinin işıq, qaz, istilik, su problemi ilə bağlı müraciət etdiyi aidiyyəti qurumlardan cavab ala bilməməsi problemi çoxlarına tanışdır. Yaradılan qaynar xətlərdən isə ya cavab almaq olmur, ya da telefonlar daim məşğul göstərir. Xarici praktika barədə az da məlumatı olanlar isə bilirlər ki, bizdən fərqli orada yerli bələdiyyələr problemlərə operativ və sürətli reaksiya verir, sakinlərlə interaktiv əlaqəni diqqətdə saxlayırlar. Amma bizdə kanalizasiya, qaz, su və digər bu kimi problemlərin həllini aylarla gözləmək az qala həyat tərzinə çevrilib.

Sadalanan problemlərə son qoymaq məqsədilə Binəqədi Rayon İcra Hakimiyyəti ilk dəfə yeni - "Sakinlərin Müraciət Xidməti - 1646" (SMX-1646) xidmət mərkəzini istifadəyə verib. Ötən ilin fevral ayından fəaliyyətə başlayan xidmət problemlərin həlli üçün rayon sakinlərinə yalnız bu ünvana müraciət etmək fürsəti yaradıb.

Müraciətlər operator tərəfindən qeydə alınır və "bir pəncərə" prinsipi üzrə həllini tapır. Bu, problemlərin daha tez həll olunmasına, vaxt itkisinin aradan qaldırılmasına, şəffaflığın və vətəndaşların rahatlığının təmin edilməsinə imkan verir. Bu ildən artıq xidmətin internet səhifəsi də fəaliyyətə başlayıb. Rayon sakinləri birbaşa onlayn rejimdə internet üzərindən öz müraciətlərini edə və onları maraqlandıran suallara cavab ala bilərlər. Həmçinin "SMX-1646"nın SMS xidməti də var. Müraciət qeydiyyata alınan zaman avtomatik olaraq aidiyyəti qurumun rəhbərinin mobil telefonuna da SMS şəklində daxil olur.

Mərkəzin rəisi Anar Səfərov deyir ki, xidmətin səviyyəsinin qiymətləndirilməsi məqsədilə 1646 nömrəsinə edilən bütün zənglər avtomatik rejimdə qeydə alınır və lent yazısı yaddaşda saxlanılır. Hər hansı mübahisəli məsələ meydana çıxarsa lent yazısına qulaq asmaq mümkündür.

1646 nömrəsinə stasionar telefonlardan edilən zənglər ödənişsizdir. Bu xidmətin fəaliyyətində operativlik, nəzakətlilik və məsuliyyət əsas meyarlardır. Vətəndaşlara göstərilən xidmət proqram təminatı yüklənmiş informasiya texnologiyaları vasitəsilə reallaşdırılır, mübahisələrin həllini və əhalinin müvafiq informasiya əldə etməsini sürətləndirir.

Telefon xidməti daxil olan zənglərin, verilən məlumatların və göstərilən xidmətlərin qeydiyyatını aparır. Məhz bunun nəticəsidir ki, hazırda rayon icra hakimiyyətində yerli strukturların fəaliyyətinə nəzarət daha da güclənib.

Razı qalanlar, xəbəri olmayanlar...

Xidmətin fəaliyyətindən sakinlər də razılıq edir. Azadlıq prospekti-182 ünvanında yaşayan Zeynəb Məmmədova deyir ki, xidmətin ən üstün cəhəti istirahət günlərində də işləməsidir: "İstirahət günlərində qaz, su problemi olanda səbəbi öyrənməyə heç kim tapmırdıq. Amma 1646-dan zəngimizə hökmən kimsə cavab verir. Çox vaxt elə həmin gün problem aradan qaldırılır".

22-ci binanın sakini Zərifə Nağıyeva isə xidmət barədə məlumatsızdır. O deyir ki, belə bir xidmətin mövcudluğundan xəbəri yoxdur.

Anar Səfərovun sözlərinə görə, Binəqədi rayon icra hakimiyyəti başçısının imzası ilə təsdiq edilmiş qrafikə uyğun olaraq, rayonun bütün inzibati nümayəndəliklərində vətəndaşlarla görüş keçirilib və xidmət barədə onlara ətraflı məlumat verilib. Eyni zamanda, başçının tapşırığı ilə 50 min buklet, bildiriş və konvert sifariş edilərək hazırlanıb və vətəndaşların ünvanlarına göndərilməsi təmin edilib.

Qeyd edək ki, mərkəzin 4 əməkdaşı var və sualları aidiyyəti qurumlara onlar yönəldir. Burda müraciətlər elektron formada qeydə alınır. Beləliklə, problemlər həll olunur. Cavabdeh qurumlar məsələni həll etmədiyi təqdirdə müraciət icra hakimiyyəti tərəfindən Prezident Administrasiyasına yönəldilir və həmin qurum barəsində ölçü götürülür. Bu baxımdan aidiyyəti qurumlar "1646"-ya daxil olan müraciətin məsuliyyətini artıq vaxtında dərk edirlər.

Sakinlər ən çox nədən şikayət edir?

Sakinlər ən çox nədən şikayət etdiyi də maraqlıdır. Bunu bilmək üçün sakinlərin müraciət xidmətinə bu ilin yanvar ayının 1-dən mart ayının 31-dək olan göstəricilərə baxmaq kifayətdir.

Anar Səfərov deyir ki, qeyd olunan tarixədək daxil olan zənglər təhlil edilərkən müəyyənləşdirilib ki, cavablandırılmış zənglərin sayı 8596, birbaşa cavablandırılmış zənglərin sayı 7007, yaradılmış əks əlaqələrin sayı 2304, tərtib edilmiş şikayət vərəqələrinin sayı 1590 olub: "Bundan əlavə xidmət səviyyəsi 94 faiz təşkil edib. Bu 30 saniyə ərzində cavablandırmaq üçün müfəttiş-operatorlar tərəfindən qəbul edilmiş zənglərin ümumi daxil olan zənglərdə faiz nisbəti deməkdir.

Daxil olmuş şikayətlərin 529-u və ya 33,3 faizi su-kanalizasiya, 351-i və ya 22,1 faizi qaz təchizatı, 206-ı və ya 13 faizi istilik təchizatı, 169-u və ya 10,6 faizi lift problemləri, 109-u və ya 7 faizi sakinləri narahat edən digər məsələlərdir. Sakinlərin müraciətinin 108-i və ya 6,8 faizi elektrik təchizatı, 69-u və ya 4,3 faizi yolların yararsız olması, 48-i və ya 3 faizi zibil və tullantılar ilə əlaqədar olub".
Xidmət rəisinin deyir ki, şikayət xarakterli 1590 müraciətin 1397-i və ya 87,8 faizi tam, 10-u və ya 0,7 faizi qismən, 83-ü, yəni 11,5 isə müvafiq izahat verilərək həll edilib.

Naibə QURBANOVA