Azərbaycan Aİ ilə əməkdaşlığın dərinləşməsini həyata keçirəcək - Rəy

Bu il TAP-ın tikintisinin tamamlanması və mavi yanacağın İtaliya bazarına çıxarılacağı gözlənilir. Azərbaycanın ümumi ticarət dövriyyəsinin 40 faizdən çoxu Avropa İttifaqının payına düşür. Eyni zamanda Azərbaycan ixracatının təxminən yarısı məhz Avropa İttifaqına yönəlib.

Bu fikirləri Teleqraf.com-a açıqlamasında Milli Məclisin deputatı Vüqar Bayramov bildirib.

Deputat qeyd edib ki, Azərbaycan Avropa İttifaqı ilə Şərq Tərəfdaşlığı proqramı çərçivəsində əməkdaşlıq edir və bu istiqamətlərdən biri də iqtisadi inteqrasiya və standartların uyğunlaşdırılmasıdır: "Avropa İttifaqı Azərbaycan üçün yeni və 500 milyondan çox istehlakçısı olan bir bazardır. Azərbaycan məhsullarının Aİ bazarına daxil olması əsas prioritetlərdəndir. Rəqabətli bazardır, rentabellidir, xüsusən də qeyri-neft sektorunda çalışan sahibkarlar üçün burada gəlir əldə etmək imkanları daha genişdir. Azərbaycan eyni zamanda Avropa İttifaqının enerji təhlükəsizliyinə töhfə verən ölkədir".

Vüqar Bayramov bildirib ki, Prezident İlham Əliyevin təşəbbüsü ilə reallaşan Cənub Qaz Dəhlizinin Avropanın, xüsusən Cənubi Avropanın enerji təhlükəsizliyinə birbaşa töhfə verəcək:

“Artıq bu il ərzində TAP-ın tikintisinin tamamlanması və mavi yanacağın son olaraq İtaliya bazarına çıxarılacağı gözlənilir. Bu da imkan verəcək ki, Azərbaycan Avropanın enerji təhlükəsizliyində yeni alternativ mənbə rolunu oynasın. Cənub Qaz Dəhlizinin ötürücülük qabiliyyəti hazırda illik 16 milyard kubmetrdir. Gələcəkdə bu həcmin 31 milyard kubmetrə çatdırılması nəzərdə tutulur. İlkin mərhələdə Avropaya 10 milyard kubmetr, ikinci mərhələdə 20 milyard kubmetr qazın nəqli planlaşdırılır”.

Millət vəkili əlavə edib ki, bu da nəticə etibarilə Azərbaycan və Avropa İttifaqı arasında əməkdaşlığın gücləndirilməsi ilə yanaşı, ölkəmizin Avropanın təhlükəsizliyinə töhfəsinin artmasına gətirib çıxaracaq: "Bu, ondan xəbər verir ki, tərəflər arasında əməkdaşlıq stratejidir. Prezident İlham Əliyevin dəfələrlə qeyd etdiyi kimi, Azərbaycan müstəqil şəkildə xarici siyasətini qurur. Xarici iqtisadi siyasətin qurulmasında da Azərbaycan müstəqil mövqe nümayiş etdirir. Bu, o deməkdir ki, Azərbaycan müstəqil mövqeyini qorumaqla növbəti mərhələdə də strateji olaraq Aİ ilə əməkdaşlığın dərinləşməsini həyata keçirəcək".