Türkiyə zəlzələnin iqtisadi nəticələrini aradan qaldıra biləcəkmi? - Deputat

"Son zəlzələ Türkiyə iqtisadiyyatının 10 faizinin cəmləşdiyi coğrafiyadadır".

Telaqraf.com xəbər verir ki, bunu Milli Məclisin İqtisadi siyasət, sənaye və sahibkarlıq komitəsinin üzvü Vüqar Bayramov deyib.

Deputat Türkiyədə dəhşətli zəlzələnin baş verməsindən 1 həftə keçdiyini bildirib: "Artıq zəlzələnin iqtisadi nəticələrinin aradan qaldırılması ilə bağlı müzakirələr aparılır. Aydındır ki, 13.4 milyon vətəndaşın yaşadığı bölgədə minlərlə binalar, o cümlədən evlər, sosial obyektlər hospitallar və digər infrastrukturun yenidən bərpası ciddi maliyyə resursları tələb edir. İlkin qiymətləndirmələrə görə, zəlzələ Türkiyə iqtisadi artım tempini 2.0 faiz bənd azalda bilər”.

Vüqar Bayramov 1999-cu ildə Türkiyədə baş verən zəlzələnin miqyasının və nəticələrinin müqayisəsini aparıb: “Nəticələr göstərir ki, qardaş ölkə bu sınaqdan da zəifləmədən çıxacaq. Belə ki, 1999-cu il zəlzələsi Türkiyə iqtisadiyyatının 35.0 faizinin formalaşdığı ərazilərdə baş vermişdi. Son zəlzələ qardaş ölkə iqtisadiyyatının 10.0 faizinin cəmləşdiyi coğrafiyadadır. Əgər 1999-cu il zəlzələsi daha çox sənayeləşmiş zonada olmuşdusa, bu dəfə nisbətən az sənayeləşmiş ərazini əhatə edir. Nəhayət, Türkiyə 1999-cu ilə nisbətən daha güclü iqtisadiyyata malikdir. Əgər 1999-cu ildə Türkiyədə ÜDM-in həcmi 256 milyard dollar idisə, indi bu rəqəm 819 milyard dollardır.

Türkiyənin güclü olması türk dünyasının daha güclü olması anlamına gəlir. Bu baxımdan, Türkiyə iqtisadiyyatının zəifləməməsi, güclənməsi həmçinin türk dövlətlərinin inkişafı üçün də stimuldur. Allahdan zəlzələdə dünyasını dəyişənlərə rəhmət, yaralananlara şəfa diləyirik”.