Mənsum İbrahimov qardaşının keçirdiyi ağır yol qəzasından danışdı

Xalq artisti Mənsum İbrahimov qardaşı Zülfüqar İbrahimovun Kürdəmirdə keçirdiyi ağır yol qəzasından danışıb.

Mənsum İbrahimov Teleqraf.com-a açıqlamasında qəza nəticəsində qardaşının qayınanasının vəfat etdiyini açıqlayıb:

"Qardaşım ailə üzvləri ilə oğlu İsrafil İbrahimovun ildönümünə gedirdi. Bu gün İsrafil İbrahimovun vəfatının ildönümüdür. Kürdəmirdə qardaşımın idarə etdiyi "Kia Sorento" markalı avtomobilin qarşısına başqa avtomobil çıxıb. Maşını kənara çəkmək istəyəndə idarəetməni itirib və qəza baş verib. Maşın aşıb və qardaşımın qayınanası rəhmətə gedib. Qardaşım və ailə üzvləri də müxtəlif bədən xəsarətləri alıblar. Onlar evdə həkim nəzarətindədirlər".

Qeyd edək ki, hadisə dünən saat 08:50 radələrində Kürdəmirdə baş verib.

Zülfüqar İbrahimov Vətən müharibəsi şəhidi İsrafil İbrahimovun atasıdır.