“Azəriqaz” MN-i niyə məhkəməyə verib - Rəsmi

Son günlərdə Müdafiə Nazirliyi və “Azəriqaz” İstehsalat Birliyi arasında istifadə olunmuş təbii qaza görə yaranmış borcla bağlı iddia gündəmə gəlib.

Məsələ ilə bağlı “Azəriqaz”dan Report-a bildirilib ki, “Azəriqaz” öz fəaliyyətini maliyyə hesabatlarının beynəlxalq standartlarına uyğun olaraq aparır və bu maliyyə hesabatları hər il nüfuzlu beynəlxalq audit təşkilatları tərəfindən yoxlanılır.

Qeyd edilib ki, beynəlxalq tələblər baxımından, müqavilə üzrə yaranmış borc münasibətləri qanunvericiliyə uyğun olaraq tənzimlənməli və maliyyə hesabatlarında öz əksini tapmalıdır. “Beləliklə, borclanma ilə bağlı iddiaların qaldırılması beynəlxalq qurumların və qanunvericiliyin tələblərindən irəli gələn məsələdir:

“Azəriqaz” və digər qurumlar, o cümlədən dövlət qurumları mülki münasibətlərin iştirakçısı kimi çıxış edərək sərf etdiyi təbii qaza görə müəyyən olunmuş məbləği ödəyirlər. Bu zaman bəzən təbii qazdan istifadə edən qurum tərəfindən müəyyən vəsaitin ödənilməsində gecikmələr yarandığına görə borclanma yaranır. Belə halda “Azəriqaz” tərəfindən normal prosedur qaydalara və qanunvericiliyin tələblərinə (iddia müddəti və s.) uyğun olaraq müvafiq yazışmalar aparılır və bəzən məhkəmədə iddia qaldırılır”.

Bildirilib ki, Müdafiə Nazirliyi ilə bağlı qaldırılan iddialar da digər qurumlarla bağlı qaldırılan iddialar kimi qanunun tələblərindən, eləcə də beynəlxalq standartların tələblərindən irəli gələn normal bir prosedurdur və burada hər hansı qeyri-adi yanaşmadan söhbət gedə bilməz. “Təcrübədə əvvəllər də köçürmələrin gecikməsi ilə bağlı müxtəlif qurumlara qarşı iddialar qaldırılıb, yaranmış borcla bağlı ya məhkəmə qərarı, ya da tərəflər arasında razılıq yolu ilə həll olunub. Düşünürük ki, gələcəkdə də bu səpkili məsələlər, problemsiz olaraq, öz həllini tapacaq. “Azəriqaz” İB də bütün qurumlara, o cümlədən Müdafiə Nazirliyinə, hazırda olduğu kimi, gələcəkdə də böyük məmnuniyyətlə xidmət göstərəcək”,-açıqlamada vurğulanıb.