Azərbaycanın koronavirusla mübarizəsində 3 mühüm faktor – Şərh

Xüsusi olaraq qeyd etməliyəm ki, Azərbaycan hökuməti koronavirus pandemiyasının qarşısının alınması ilə bağlı olduqca peşəkar və çevik tədbirlər həyata keçirir. Bu proses birmənalı şəkildə dəstəklənməlidir.

Bunu Teleqraf.com-a açıqlamasında “Xalq Cəbhəsi” qəzetinin baş redaktoru, siyasi şərhçi Elçin Mirzəbəyli deyib.

O bildirib ki, bu faktor əslində dolayısıyla Ümumdünya Səhiyyə Təşkilatının yaydığı məlumatlarda da öz əksini tapıb:

“Azərbaycan koronavirus pandemiyasının ən çox yayıldığı ölkələrin biri – İranla həmsərhəddir. Eyni zamanda, tranzit yolların üzərində yerləşir. Ölkə ərazisindən çoxsaylı nəqliyyat dəhlizləri keçir. Belə bir şəraitdə koronavirusun qarşısının alınması üçün tədbirlərin həyata keçirilməsi və ciddi nəticələrin əldə olunması çox çətindir. Buna baxmayaraq, Azərbaycan öz ərazisini virusun yayılmasından ciddi şəkildə qorumağı bacarır və istənilən hadisəyə, fakta, yaxud hansısa informasiyaya, məlumata çox çevik reaksiya verir. Biz, media nümayəndələri olaraq da prosesin şahidiyik və görürük ki, Nazirlər Kabineti yanında operativ qərargah bu prosesdə necə aktiv şəkildə iştirak edir. Bütün işlər dövlət qurumları arasında fəal şəkildə koordinasiya olunur”.

E. Mirzəbəyli qeyd edib ki, önəmli olan faktorlardan biri də Azərbaycanın ÜST ilə çox yaxından və səmərəli əməkdaşlıq etməsidir:

“Eyni zamanda, Azərbaycan koronavirusun yayılmasının qarşısını almaq üçün ÜST-nin ən qabaqcıl laboratoriya müayinə dəstlərini alan 17 ölkədən biridir. Bunun özü də çox böyük göstəricidir. Əslində bu, həm də sübuta yetirir ki, vətəndaşların sağlamlığının təmin edilməsi və ölkəmizin hər cür təhlükədən qorunması Azərbaycan dövləti üçün prioritet məsələlərdən biridir. Pandemiyanın yayıldığı ölkələrin sayı günü-gündən artmaqdadır. Bu günə olan məlumata görə, 127 ölkədə koronavirus yayılıb. Azərbaycan 127 ölkə arasında 17 ölkədən biridir ki, ən müasir avadanlığı, qabaqcıl laboratoriya dəstlərini alıb ölkəyə gətirib və vətəndaşların qorunması üçün müvafiq tədbirlər həyata keçirir”.

Müsahimiz bildirib ki, bununla yanaşı Azərbaycan koronavirusun qlobal miqyasda qarşısının alınması istiqamətdə addımlar atır. Onun sözlərinə görə, ölkəmiz bütövlükdə beynəlxalq proseslərdə aktiv şəkildə iştirak edir:

“Azərbaycan BMT-nin humanitar missiyasının həyata keçirilməsində də fəallıq nümayiş etdirən ölkələrdən biridir. Təbii fəlakətlərin qarşısının alınması istiqamətində ölkəmiz mütəmadi olaraq yaxın və uzaq ölkələrə yardım göstərir. Bildiyiniz kimi Azərbaycan həm Ümumdünya Səhiyyə Təşkilatının strateji hazırlıq və cavab planına 5 milyon ABŞ dolları ayırıb. Eyni zamanda qonşu İrana da epidemiyanın qarşısının alınması istiqamətində müvafiq tədbirlərin həyata keçirilməsi üçün 5 milyon ABŞ dolları məbləğində yardım göstərib. Hər ikisi ciddi humanitar addımlardır. Bu, Azərbaycan dövlətinin qlobal məsuliyyətini nə dərəcədə dərk etməsindən irəli gələn faktordur. İndiki şəraitdə hətta maliyyə resursları etibarilə Azərbaycandan kifayət qədər geniş imkanları olan ölkələr var, amma bizim sərgilədiyimiz bu mövqeni təəssüflər olsun ki, onlar göstərə bilmirlər. Bu baxımdan təsadüfi deyil ki, ölkəmizin atdığı addımlar Ümumdünya Səhiyyə Təşkilatı tərəfindən də təqdir edilir, eyni zamanda bir çox ölkəyə nümunə göstərilir”.

Qeyd edək ki, Ümumdünya Səhiyyə Təşkilatının saytında (www.euro.who.int/en) qurumun missiyasının Azərbaycana səfəri və ölkəmizin koronavirusun yayılmasının qarşısının alınması istiqamətində həyata keçirdiyi tədbirlər, ÜST-lə əməkdaşlığı təqdir olunub. Materialda bildirilir ki, Azərbaycan infeksiyanın geniş yayıldığı İranla həmsərhəd olsa da, öz ərazisini virusun yayılmasından etibarlı şəkildə qorumağı bacarır. Həmçinin, Azərbaycan ÜST-lə səmərəli əməkdaşlıq edir və koronavirusun yayılmasının qarşısını almaq üçün ən qabaqcıl laboratoriya dəstlərini alan 17 ölkədən biridir. Bundan əlavə Azərbaycanın humanitar sahədə qlobal problemlərin həllinə dəstəyi və töhfələri, ölkəmizin ÜST-ə 5 milyon dollar ayırması təqdir edilir və bunun bir çox ölkələr üçün nümunə olduğu vurğulanır.